Meeting Tuahning

          

Written by: Rev. Dr. Sang Awr

Biadomhnak: Khrihfabu hruainak ah phungchim le thlacam lawngin a za lo. Khrihfabu tthanchonak caah biaceih le khuakhan a herh. Meeting tuah hi tthancho phunkhat a si. Zeicatiah biakhiahmi nih thilttha tampi a chuahpi. Meeting ah cun mizapi le mi tam deuh ruahnak kha laak a si caah a tthathnemnak a um. Asinain meting a tuah zia kan thiam lo tikah buainak a chuahpi caan a um ve tawn. Meeting tuahning hi cauk ngan pipi in an chuahmi a si nain a herh deuh tete kan hun langhter lai.

I. Meeting Tuahnak Nih Aa Tinhmi

                           01.  Meeting zoh dawh le felte in tuah khawhnak
                          02.  Mi tam deuh hnatlaknak in bia khiah khawhnak
                          03.  Mi tlawm deuh duhnak kha hmaizahpiaknak
                          04.  Meeting a kaimi paoh nih bia chim khawhnak le biatung dirh khawhnak

                          05.  Meeting a kaimi paoh nawlngeihnak i tluk cio khawhnak
                          06.  Biaceih ding agenda suai thiamnak
                          07.  Chairman le a dang hruaitu hna nih an rian an i theih khawhnak
                          08.  A caan ngeihmi chungah zoh dawh zoh remte in bia chim thiamnak
                          09.  Baiceihmi ttialning le biakhiah thiamnak… tehna caah a si.

II. Meting Timhlamhnak

01.  Meeting sawmnak ca kuat ding, a caan le  a hmun fiangte in ttial ding (General, Church Council Meeeting caah a herh khun)
02.  Ceih dingmi agenda kha Pastor, Church Chairman le Secretary nih thate in Khrihfabu caah ceih awk a herhmi kha an ruahcia lai. Khrihfabu caah chunmang tthattha an manh lai i, ceihkhan awk ah an chuahpi lai.  Timhcianak tthate in an ngeih ahcun, biaceih khuakhan tikah rian a fawiter deuh.
03. Meting he aa pehtlaimi paoh tthate in ruahcia le timhlamh dih ding. Timhlamhnak a tthat ahcun ningcangte in a kal kho i meeting tuahmi sullam a ngeih pinah a kaimi zong an i nuam.

III. Chairman Rian

Meeting chairman a thiammi nih an ttuan ahcun meting a nuam i biakhiah a fawi. A kaimi zong an tha a nuam i Khrihfabu caah tthathnemnak a chuahpi. Meeting a tluan khawhnak caah Chiarman cu a biapi ngaimi a si. A rian a biapi deuh hna cu:

01.  Meeting dawhte le remte in a kal khawh nakhnga a rian ngan bik a si.
02. Mithmai in siseh, kaa in siseh, meeting a kaimi cungah duhdanhnak a ngei lai lo. Biakhiahnak dik a chuah khawhnak aa zuam lai.
03.  Daihnak le upat awktlak mithmai put aa zuam lai.
04.  Midang chimmi bia kha tthate in ngaih le theihpiak aa zuam lai.
05.  Biaceihmi agenda pial lote in kanh aa zuam lai.
06.  Biapi le biate a tthenhai thiam lai. Caan a upatmi a si lai.
07.  Ruahnak kaumi le lungsaumi a si lai.
08. Bu hruainak phung upadi a thiammi a si lai.
09. Bia tam tuk a chim lai lo. Midang lung fiannak caah a fianter lai.
10.  Biachim rih lomi caan pek le ruahnak hal aa zuam peng lai.
11.  Meeting a kaimi thinlung theih khawh aa zuam lai.
12.  Khrihfabu cungah dawtnak le siaherhnak nganpi a ngei lai.
13.  Meeting tuah tikah Pathian duhnak kha kawl le ruah peng aa zuam lai.
14.  Bia chim le ceihhmai a duh ahcun a bawmtu kha chairman a ttuanter lai.
15.  Me an i zah sual ahcun biakhiahnak a tuah lai.
16.  Buainak a um sual ahcun daihter aa zuam lai.
17.  Meting a buai tuk ahcun meeting kha a thawn khawh lai.

IV. Meting A Kaimi Hna An Rian

Meeting a kaimi hna an rian hi a biapi tuk ve. Pakhat cio nih thilttha a chuah khawh nakhnga an i zuam cio lai. Khrihfabu dawtnak thinlung an ngei lai i bia an chim tikah khuaruat bute in a tthahnemmi bia kha an chim lai. A biapi deuhdeuh hna cu:

01.    Ceihmi a kong agenda an theih lai. Thei satsai loin bia a chim lai lo.
02.    Midang bia chimmi tthate in a ngaih lai. Bia lutaw theih aa zuam lai.
03.    Biadawh lo, bia chiakha an chim lai lo. Biadawh holhdawh an hman lai.
04.    Pumpak ngiarnak, zapi caah theih nuam lomi chim an hrial lai.
05.    Chairman kha upat hmaizahnak an ngei lai.
06.    Ceih liomi bia he aa pehtlai lomi an chim lai lo.
07.    Minung hawi he biaceih a si nain, Pathian a kai ve ti a hngalh lai i ttihzahnak he a chim lai.
08.    Bia chim an duh tikah Chiarman hnatlaknak an laak lai.
09.    Bia chim a duhmi nih kutthlir, asiloah, “Chairman” tiah an au hmasa lai.
10.    Agenda ceih liomi pakhat ah voihnih cung chim lo a ttha bik.
11.    Meeting chungah a thin a tawi lai lo. Thinhun ahcun palh a fawi tuk ti a theih peng lai.
12.    Voikhat chim ah sau tuk in a chim lai lo,  tawi fiang in chim aa zuam lai.
13.    Phungchim tazahawt phun in chim lo ding. A duhnak te lawng kha a fianter lai.
14.    Midang an chim lioah dirchih, chimchih an hmang lai lo.
15.    Zapi hnatlakmi kha cohlan khawh aa zuam lai.
16.    A dongh tiangin kai aa zuam lai i caan upat aa zuam lai.

V. A Tlamtlingmi Meeting Biakhiahning

01.    Hruainak Phunghram le Phungtteng ning in, zatceo maw, cheuthum cheuhnih an kai tikah a tlamtlingmi meeting tuah khawh a si.
02.    Meeting kai ding (quorum) an tlin lo tikah an thawn lai i meeting dang an auh lai. Auh tthanmi meeting ah cun a kaimi paoh nih biaceih khawhnak a um.
03.    Bia sawhsawh cu mi tam deuh hnatlaknak (simple majority) in biakhiah khawh a si.
04.    A biapimi cu cheuthum cheuhnih hnatlaknak (2/3 majority) in biakhiah a si.
05.    Zapi hnatlaknak in (unanimous consensus) biakhiah hi a ttha bik.
06.    Hruainak Phunghram le Phungtteng hna ning in zulh ding.

VI. Biatung Dirhning (Asu Tunning)

01.    Phunghram le phungtteng ning in meeting a kaimi nih biatung a dirh khawh lai.
02.    Dirhkamhtu a ngeih lawngah a dirhmi biatung a nung kho.
03.    Biatung zeizat dah a um kho lai? Dirhkamhtu a ngeih lo ahcun biatung pahnih hi a ttha bik.
04.    Lakhruak biatung (privileged motion)
05.    Biatung dirhmi remhnak (to amend)
06.    Kawmitti kut ah chiahnak (to commit)
07.    Thawnmi biatung (to postpone)
08.    Ceihciami ruahtthannak (to reconsider); 2/3 me a herh.

VII. A Nuammi Le A Thami Meting

01.    Chairman nih zoh dawhte le tluangte in a hruai thiam tikah.
02.    Meeting a kaimi nih meeting upat hmaizahnak an ngeih tikah.
03.    Tawi fiang le zapi theih khawh awkin an chim cio tikah.
04.    Meeting chungah thin sauté le Pathian ttihzah bu in bia an chim cio tikah.
05.    Biahalnak in thok lo ding (leading, siloin, open-ended question) - “A si ko lo maw? Biakinn remh ding nan hna a tla ko lo maw? tiin  chim lo ding. “Biakinn remh hi a herh ngai caah zeitindah nan ruah cio?” ti ding a si.
06.    Bia ngaihzia thiam le bia lutaw thei bute in an chim cio tikah.
07.    A fimthiam le a hngal deuh sinah ruahnak laakzia an thiam tikah.
08.    Meeting a caan chung an lim khawh tikah.
09.    Thinhunnak le pumpak ertaunak a um lo tikah.
10.    Bia funzia an thiam tikah.
11.    Zapi hnatlaknak in biakhiahnak a um khawh tikah.
12.    Khrihfabu caah a tthahnemmi bia an khiah khawh tikah.

VIII. A Nuam Lomi Meting

01.   Zapi tthatnak zoh loin mah duhnak lawngin  a kalpimi an um tikah.
02.  Holh tam tuk le atu le atu a thomi an um  tikah 
03.  Thinhunnak le siktthiatnak a um tikah.
04.  Mi duhdanhnak le zeirel lonak le i hmuh thiam lonak a um tikah.
05.  Biachimtu nih sau tuk le cawnpiak phun in an chim tikah.
06. Biathlir cawi hmangmi, a si loning  (negative) tuk in a letthalmi an um tikah.
07.  Meeting upatzia an thiam lo tikah.
08.  A dai tukmi, asiloah, a lung a tho lomi an tam tikah.
09.  Chairman a ttuanmi zei an rel hna lo tikah.
10.   Pumpak miaknak le minthannak a kawlmi an um tikah.
11.   Biakhiahmi an duh lo tikah, an pom khawh lo tikah.

IX. Meeting Biakhiahmi Fehternak

01.    Meeeting tuah tikah a hlan meeting biakhiahmi kha reltthan ding.
02.    Ceihningte in aa ttial maw, hrelhmi, chapmi a um sual maw, tiah zohtthan ding.
03.    Ceihning deuh in ttial a si lo ahcun, remh  than ding.
04.    Biafang hmanmi zapi theih khawhmi hman ding.
05.    Meeting a rak kaimi lawng nih fehternak biatung dirh le dirkamh khawh ding.

X. Meeting Tuahmi Zohtthannak

01.    Chairman ttuan a thiam maw?
02.    Meeting kaimi lunglawm thanuamte in an um maw?
03.    Meeting sawmmi tlamtling in an kai maw?
04.    Report le cattialmi palh lo le tlingte in a um maw?
05.    A tthahnemmi biakhiahnak a chuak kho maw?
06.    Meeting nih aa tinhmi le saduhthahmi a phan kho maw?
07.    Meeting kaimi pakhat le pakhat upat hmaizahnak an i ngei hna maw?
08.    Hruainak Phunghram le Phungtteng he ai ralkah in biakhiahmi a um maw?
09.    Zapi ruahnak in a kal maw? Mi tlawmte duhnak lawngin dah a si?

Biafunnak: A cunglei kan ttialmi hna hi mibu hruainak le meting tuahnak ah a herhmi tlawmpalte lawng a si. A tlamtlingmi a si lo. Upadi bantukin ruat loin mah le Khrihfabu le hruaitu hna nih a herhning le a tthat bik ning in hman khawh a si.

Cattialtu Chirhchanmi Cauk:

Mac Carty, Barry: A Parliamentary Guide for Church Leaders (Nashville: Broad man, 1987)
Sang Awr, Khrihfabu Thithruai Thiamnak (Yangon: LBC, 2004)
Mall, Jane E. Handbook for Church Secretary (Nashville: Abingdon Press, 1982)

Editor's Note: Mirang holh in "Meeting", Laiholh in 't' tawdeh ngei ''Meting'' tiah hman an si; Laiholh in Muko Mekazin ah 't' tawdeh ngei in ttial a si. "t" tawdeh ngei in ka ttial khawh lo ruang ah "Meeting'' in ka run hman.