NI CEU DAWH TE A LIAM HLAN AH

Victor Van Hre Lian

Second pakhatte hmanh dinh caan ngei loin a her zungzal mi vawlei ahhin, saduhthahnak chun mang ngan pipi he a her zungzal mi minung kan nunnak kan chan zoh tikah hin kan ke nih a lamh mi vawlei in sermi kan si dih hna i   kan sinak pum a simi vawlei ahhin nikhat khat ah a kir than dih cio te dingmi kan si hna. Kan kir than hna hlan bel ahhin thinlung, pumsa, retheih thabat ngaiin dinh ni hmanh thitha ngeih khawh lo in chun chun zanzan in a her peng ve mi nunnak kong ruah zawn ahhin thlanhri pi puak in dinhcaan ngei loin kan cawlcangh peng mi vialte hna zong hi mitthep kar, caan chung ca lawng a rak si ko hna i, a caan a phanh tik cun el awk, tlaihawk, auhthan awk that loin caan sinah a liam dih dingmi lawngte kan si cio ko hna. Kan i her ve lengmang hna lio ah hin cun kan sining  dirhmun zohtik bel ahhin  kan mui kan i lawh hna lo bantukin kanruah nak, kan thil-ti khawhnak, kan fimthiam nak , kan singning dirhmun le kan eidin kan fenhaih, nungphung….etc….. tiangin kan i dangdih ko hna lai naiin thladem bantuk a si mi caantawi te kan nunchung ah cun minung kan nunnak he thenawk a tha lo mi lawmhnak ngeichiat nak, thihnak, fahnak , mitthli tlaknak …etc… hna bel hi a minung a si mi paoh nih kan nun chungah kan hrial khawh lo mi an si hna.

Caantawi te chung kan sining kan i khah hna lo hi cu vawlei a si caah a si ko. Sihmanhsehlaw kan dihlak in kan i khah dihnak hmun le kan kir than dih nak ding hmun kan phak hlan bel ah hin kan minung hawi bantuk cio in kan mah le kan khaptawk, kan pahrang cio te ah hin i her lengmang hna in thadi zaangba ngaiin a cawlcaang mi kan si cio hna. Cu ahcun second pakhat chungte hmanh ah minung thluak nih a phanh/tuak khawh lo ding tiangin  a thangcho mi kan vawlei ah hin ruahlo pipi in kan i tong/hmu cio hna i kan kut nih dehkhat te hmanh a sak/tongh sual lo nak inn thatha hna le mifim,mirum pawl an khuasak nak ram thatha tampi ah PATHIAN dawtnak lamhruai nak thawngin kan phanh hna i khua kan sak ti cio hna i kan tlawngleng ti hna i a tu hi pei chuahchan ngeimi ka si cu tiah nuamh cialmal in zei khuahmanh tuaktan kan thei lo lio caan le ar farual bang kan i nuamtuk hna lio caan hna ah hin  ruah lo pi thiamthiam in nuntian he thihtian nak hna kan cungah a phanh tawn i lungkhuai mitthli zunngeih nak he ni thla kan rel tawn hna i hawidawt  cheukhat tampi hna cu dawtu bianem kaa khat te hmanh theih ta manh lo in le taangnem hmanh pomta manh lo in leidai a ciam mi hi kanmah laimi chung hrimhrim ah hin kan tlawm ti hna lo timi hi mit in hmuhkhawh a si.

 A hmun lo mi dingmi chikhat te hmanh dinh caan ngeilo in a her zungzal mi kan vawlei ah hin ruahchannak le saduhthah chunmang ngan pipi he rili ral vanhram deng tiang kan khualtlawnnak hna ah hin zei ruahchannak bik he chuk le cho ah mitku hmanh cim caan ngei loin le rawl ei chungpil kho lo tiangin zuunngeih lungfah lileng ngaiin mah khua le ram inn le lo ruuninn chumtual nu/pa u nau a ngei lo bangin kan vahvaih nak caan hi a tawi ti lo i a tu hnu hmailei ah tah zei caan tiang remruam dah kan retheih vansang au in kan hrum-ai rih hna lai timi hi kan ruat bal cio maw?

Ni khatkhat ah cun hi vawlei chikhat te kan khualtlawn nak  a si mi a hmun lo dingmi hmun le ram ah hin kan mah le kan khap cio tein ni ceu dawh a tlak hlan te ah kan tuahser kan i zuam nak vialte hna le kan lung thlitum saduhthah nak vialte hna hi tlamtling kho hram seh law zeitluk dah a nuamh hnga i kan va i lawmhtuk cio hna hnga.Na bel tein cu nak in a tha chinchin dingmi cu hi kan vahvaihnak le  kan khualtlawn nak a si mi le zungzal kan umnak ding hmun a si lo mi kan um/ i dor chungnak hmun paoh hi niceu dawh te a tlak hlan teah PATHIAN ram ah ser ta kho hna u sih law zeitluk dah lunglawmh awk a si chinchin hnga i mi vialte nih nangmah le keimah hmangin Jesuh cu Bawi a si ti kho hna seh law chuahchan a ngeibik le mi vantha taktak kan si cio ko hnga.Kan dihlak in dawtnak he hmunkhat te ah PATHIAN pek mi kan pahrang cio chuah in niceu dawh te  a liam hlan ah tho in tuan cang hna uh sih.