“Thihnak hi zei a si loh. Asinain teimi
si cu ni fatin thih a si,”
Vawlei ralbawi minthang hna lak zongah
mitampi nih minthang bik ah an ruahmi pa Napoleon min a theilomi hna cu mi
hnachet le mihrut an si lai tiah an chim lengmang tawn. France ram thlanglei
Mediterranean rili tikulh hmete Corsica an timi ah Napoleon cu a rak chuak.
Italy mi pawl nih hrinmi men sihmanhsehlaw “Emperor” (Ram kaupi) ah bawi
minthang “A ke voikhat a per khawn ahcun Europe ram cu ai hnin dih ko” an timi
cu Napoleon hi a si.
Mi pate a si ruangah “Little Coporal”
(Ralkap Senhnih a famite) ti’n an bawile nih a min an phuah. Hruaining phungttha
zeimaw zat a ser hna i, cozah kilning thar a ser chih. Cu phung cun France ram
lawng siloin Europe ram pumpi nih an i zohchunmi phung ah a hung cang. Napoleon
cu Cosica rili kam i khuapibik Ajaccio ah 5 August, 1769 kum ah a chuak.
Napoleon a chuah hlan deuh ah mah hi rili kam hi ‘Geonese’ hna nih France cozah
sinah an rak pek. Napoleon a pa Carlo Buonaparte cu phung a theimi a si i; a nu
Letizia Ramolino cu nudawh taktak a si pinah a thil ai tinhmi kongah a duh fak
taktak mi zong a si.
Napoleon le a u Joseph cu caan raulote
France ram, Autun hmun ah ca an cawng tti. Mah hihnu ahhin Napoleon nih Brinne
Military college ah kum 5 chung ca a cawn chap tthan rih. Cun Paris khuapi i
military Academy ah kumkhat chung a cawng tthan nolh i mah hi a cawn chung
ahhin a pa cu pawfah Khenser (cancer) zawtnak in a thi. Napoleon te unau hi
minung 8 an si i; a nu nih harnak le sifahnak tuar ngaingai in a cawmken mi hna
an si. Amah hi fapa upa bik si lo hmanhsehlaw Napoleon cu kum 16 lawng a si lio
in chungkhar tawlreltu le khuakhangtu bik a si cang. 1785 Kum September ah
Military Academy a result cu a chuak i, a cawngmi minung 42 lakah 35nak ceo in
a rak awng.
Military College in a dih hnu ah
ralkap officer hngakchia deuh pawl an cawnnak hmun Lafere ah Second Lieutenant
ah an rak chiah. 1786 kum September thla ah Cosica ah a tlung i June 1788 kum
ah a umnak hmun tthing ah a kir tthan. Mah lioah hin France Revolution cu an i sualsawrawk
lio ttum kha a si. Voltaire le Rosseaukong hna cu a rel tawn hna. Mah a relmi
chung cun cozah i hruaining cu sersiam a herh tiah lungputnak a rak ngei.
1789 kum ah France mizapi tapung an
tho hna i Napoleon zong Corsica ah a kir tthan ve. Corsica tapung hruaitu Paoli
nih Napoleon cu a rem phunte a si lo ruangah Napoleon cu France ram ah a kir tthan.
1791 April thla ah hriamtlai in miakpi a pumi hna (artillery) ah first
Lieutenant caah lak a si. Valence hmun ah a ttuanpi mi hna he umhmun an khuar.
Mah hi hmun a um lioah “Jacobin” bu sinah ai fonh. “Jacobin” hi political party
nawlngeihnak niamter a duhmi hna bu a si. Caan raulote chung ah Valence in
Jocobin bu chung ah haotu a si diam ko. Mirum milian hna le tlangbawi le bishop
hna cu an huat hna i an nun an tthinh khawh nakhnga biafak a thlaih tawn hna.
1791 September thla ah thlathum chung
dinhnak a hal hna hnuah ai din i Corsica ah a va kal. A rian ttuannak ah a rak
kir colh lo caah a tli zammi hna min an ttialnak ah Napoleon min cu ttial ve a
si. Asinain France cozah nih Austria ram tuk awk in nawl an chuah caah Napoleon
cu an ngaihthiam. Cu lawng siloin captain sinak zong an pek lehlam. France ram
ah a rak kir nain a rian cu a pehzulh loh. 1792 October thla ah Corsica ah a va
kir nolh. Mah lio caan ahhin Paoli cu Corsica tikulh ram ah nawlngeihnak vialte
a ngeitu a si. Cun France ramchung in Corsica cu zalonnak lak a timh i
hmalaknak zong a ngeih lio caan kha a rak si. Napoleon nih Corsica Jocobin bu
hna a pehtlaih ve hna. Paoli bu pawl he hin an i tinhmi ai kalh diam hoi. Mah
cu ruangah an karlak ah buainak ai ot i cu buainak cu a karh chin lengmang.
Asinain ramuk bawi hlunlei, a ttang i,
ramuk bawi kuttang ah a um duhmi hna ‘Royalist’ hna he an buai lengmang. 1796
August thla dih leiah National Convention ralkap hna nih “Marselli” khuapi an
lak khawh. Asinain ‘Bulon’ khua pawng ah British ralkap le Royalist ralkap hna nih
an rak doh chih hna i cozah ralkap miakpi a putu cu ai hliamkhuai caah amah kha
thleng dingin Napoleon cu an thim. September thla ah Major ah kaiter a vung si.
October thla ah Ajutant General ah an kaiter nolh tthan. December 16 ni ah ral
kut in hliamhma a tuar. A thaizing ah British ralkap cu Toulon hmun in an dawi
khawh hna. Mah lio caan ahhin Napoleon cu kum 22 lawng a si rih. Sihmanhsehlaw
rian ttuan teima mi le mifel taktak a si. December 22 ah Toulon dohnak ah
cawlcangh ning a thiam tuk caah Brigadier General ah a rian kaiter a si. 1794 February
thla ah Italy ram i France ralkap miakpi a putu (Arlitery) an haotu lianbik
commant rian pek chih a si. Asinain vanchiat ah amah a dawtu le a duhsaktu
Jocobin hruaitu Fobespierre cu a rian in a tla diam ai. Napoleon zong nih
tlaihkhih a ton phah. Thonginn chung in September thla ah chuahter a si.
Asinain rian belte cu a peh kho rih loh. Sual an phawtnak chimfian dingin Paris
lei ah a kal hmasa. Cu lioah hlawh a cheu lawng an pek chung rih. A upa Joseph
a nupi nau Desiree Clara he an i uar ziar ve. Asinain ai duh lo bantuk in a
kaltak chung. A duhmi rian a hmuh rih lo pinah a duh fah tuk caah midang nih an
hem tuk loh. Voikhat le bang cu Turkey bawi kuttang i rian va ttuanding tiangin
khua a ruat.
.jpg)
Directory Tangah: Ram buai lio a si i
France ram cozah cu atu le tu hruaitu an i
Cu pinah National Guard hruaitu caah
rian a pek chih fawn. Royalist dohnak a chuahpitu hna nih National Convention
bu cu nawlngeihnak chuh an timh hna. October 1795 kum ah biatak an chuah
ciammam i mah hi tihin mizapi an cawlcanghnak cu Napoleon le a hruaimi pawl hna
nih an doh hna i mitampi cu an nunnak a liam. National Convention i hruainak cu
Napoleon nih himte in a chanh i a kilven khawh.
Cu caah mizapi cozah ralkap a lubik ah
Napoleon cu rian pek a si. Cozah thar “Directory” an timi cu mizapi cozah nih a
dirh i mah hi cozah thar ahhin National cu ralkap lei kongah ruahnak petu
(Military adviser) ah an chiah. Hi lio can ah lengleh muidawh iang ngei takmi
Josephine he an i thei. Josephine hi General Beauharnais a nupi, fanu pahnih a
ngei cangmi, tlangval sinah bia le hla a thiam ngaingai mi lengleh nu a si.
Duhmi cu tthate in a ngei cang fawn i,
a caah caan ttha dang ngeih a herh ngai. 1796 March thla ah Italy ram i France ralkap
a lubik Commander in Chief caah rian pek a si tthan. Mah rian hmu ding hin zarh
zeimaw zat hmalaknak a ngei i: cun Italy doh ding ning zong tthate in a
tuaktan. Directory nih a tuaktanmi a cohlanpiak pinah amah hrimhrim a vai i tel
khawhmi kha a caah lawmhnak taktak a si. March 9 ah Josephine he an i ngei i
nihnih a ruah hnu ah Italy ram ah an kal.
Napoleon cu Italy ramchung i France
ralkap an hmunpi ah a va phan. Ralkap bawi lian ai timi hna nih an hruaitu thar
pate cu an rem lo i an lungchung in zeite ah an rel ziar lo. Tlangval kum 25 a
simi pa fate a simi le mider ttikttekte a tung nih le Pe 5 Lehmah 4 lawng a
simi raifanh hrik nih a tlakmi ko a lomite cu an lak ah cun ci ngingngengte in a
tthu ko. A hmasa bik ah a nupi thar hmanthlak cu a zohter hna. Ralkap bawi pawl
le annau le nih huaha lo thil ah an ruah. Asinain Napoleon cu an ruahning bang
a si lo. Cu caah can raulote ah ‘Supreme Commander’ minthang an rak ngeih cu an
theih colh.
Italy ramchung i France ralkap hna
hmunpi cu ‘Nice’ ti a si. Cauk chung ah cun ralkap 43,000 an si nain a taktak ahcun
30,000 lawng an si kha fiangte in a theih. Ralkap nih le hlawh an hmu ttha fawn
hna lo pinah an eidin nih le a chia taktak fawn. Cu pinah i zohkhenhnak zong tthatthi
in an hmu fawn loh.
1796 March 28 ah mah tihin Napoleon
nih bia a phuan. “Ralkap pawl, tthate in cawmkhennak pek nan si lo i, sifah
retheihnak in nan khat. Sihmanhsehlaw ramrum taktak hna i an khuapi minthang
taktak hna cu nanmah nawlngeihnak tangah an kunte lai. Mah cu caan ah hmaizahmi
sinak siseh, mintthatnak siseh, rumnak siseh, nan lucung ah lukhuh bantukin nan
i khuhte lai. Italy ram i ralkap hna raltthatnak le intuar khawhnak nan chanbau
lai maw?” tiah a ti hna.
.jpg)
Napoloen nih a hruai hna i biatak
chuah in rian an van ttuan cun teinak le mi a thei pengmi an sinak cu ai pehzul
peng. Austria le Sardinia ralkap hna cu an tei hna i Turin lei panh in an kal
lioah Sardinia bawipa (Siangpahrang) Victor Amadeus III nih remnak tuah a hal
duaimai ko hna. May 15 ah Paris ah remnak cu an ser i Nice le Savoy cu France
ram chung ah an lut. Austria hna kutchung in ‘Milan’ a lak tthan i Duke of
Parma hna, Duke of Modena hna le Pope Pius VI hna he remnak hmasabik a ser
fawn. Napoleon nih Italy ram cu tthate in an sining a cawn hna i mizapi
nawlngeihnak cozah dirh a timh. Lombardy ah mizapi duhning in cozah a dirh i ram
hruaitu caah sermi hna cu i hruaining ding phung a chimh cawnpiak hna. Modena
hna, Reggio nell’ Emilia hna, Bologna hna, Frerera hna cu hmunkhat ah a pumh
khawh hna i hmunkhat ah an dirtti hna. Cun Cisalpine Republic a dirh colh fawn.
Cu pinah France chungin tapung phunkhat Corsica va auh tthan dingin ralkap a
fial hna.
Austria ralkap hna cu Alps tlang in an
rak ra i Mantua cu doh dingin voili bakte an va kal. Napoleon nih a rak tei dih
hna i a voilinak 1797 January thla ah Mantua a va lak tthan. Mah hnu ahhin
Viena lei ah a kal i khuapi a phanh hlan meng 60 hlat in a um lioah Austria
palai an rak phan. Remnak ser dingin an soilem. Mah hi remnak ahhin Austria nih
Netherlands thlanglei ram cu France sin ah an pek i Napoleon nih a ser chungmi
Lombard Republic cu an cohlanpi ve.
1797 Assembly i thimnak ah Royalist
pawl cu an zumhnak lengin teinak an hmuh. Directory sinah Royalist pawl dohnak
dingin ruahnak a pek hna i, a herh ahcun thazaang zong in kan cawl lai tiah a
forh hna. July thla Royalist pawl thlak dih an timh hna nak cu an tlam a tling
lo ai. Napoleon cu a thinhung tuk i General Pierre Augereau le ralkap zeimaw
zat cu Paris ah a kalter hna. Gen. Augereau nih September 4 ah Royalist pawl cu
an rianttuannak in a thlak khawh hna i, cu nih cun Napoleon cu a min a tthatter
ngaingai.
Napoleon nih Austria ram he remnak ser
cu a ttha lai tiah a ruah i a duh bantuk tein i remnak cu a ser taktak. Mah hi
remnak hi Treaty of Campo Formio tiah an ti. Mah hi remnak ah Austria ram cu
Venice le Rhine tiva ral zong a pek chih hna. Directory cu an lung a tling lo
ngai nain Napoleon cu France mizapi nih an upat pinah a min a thanter chinchin.
Mah lio ah Directory hna nih British
tikulh chung ah a ummi hna cu va tuk le doh an duh hna. Napoleon nih British Tilawng
hna cu rili ah tei khawh ding an si lo tiah a theih. Cu ruangah British tthawnnak
hrampi India ram he an i tlawnnak hmun cu chahpiak dingin a timhtuah. Izip an
tuk lai tan ah, mah hi hmun i British cu kan rak bawmh hna lai i England chawleh
chawhrawlnak cu kan hrawh chih lai tiah a ti fawn. 1798 June 10 ah Malta a lak
i, July 1 ah Alexandria a lak tthan nolh hnu ah, Nile tiva kam vawlei ttha ram
hna cu caan raulote chungah a lak dih hna.
Asinain, British Admiral Hoatio Nelson
le a leiah a tthangmi a hruaimi hna nih Abou Qir Bay i tuknak Battle of the
Nile an timi ah France ralkap hna cu a tei hna. Izip la hmanh hna sehlaw rili
hmun in Mirang pawl cu an rak doh chih hna. Nile tiva kam i idohnak ah Napoleon
ralkap hna nih teinak an hmuh lo caah Napoleon cu tei khawhmi a si ve ko tiah
an theih cang caah an ral hna cu raltthatnak an ngei chinchin. Great Britain,
Austria, Russia le Turkey hna nih hmunkhat ah dirtti dingin biakamnak an ser i
France doh dingin thawng an thanh tthan hna.
Napoleon le a ralkap hna tei in an um
hnu ah France ramchung ah i hruainak cu buai ngaingai in a um tthan. Directory
hna lak i mithar Emmanuel Sieys nihcun ralkap nih kan ram a hruai lo ahcun
ramuk bawi hna nih uknak cu an dirh tthan lai tiah a hmuh. Napoleon zong nih
mizapi duhnak hruaining cu ai rawk tthan ko lai tiah a zumh ve. Cu hlei ah
France ramchung i hruainak hi mi dangdang caah caanttha a si ve kho lai tiah a
hmuh chih fawn. Paris ah kir tthan dingin ruahnak a ngei. Directory zong nih
Paris ah kir dingin a cah fawn. Cucaah British ralkap hna theih loin Tipi cu a
tan i, 1799 October 4 ni ah Paris cu a phan.
Sieyes le Napoleon cu hmunkhat ah an
dirtti i Directory pawl cu an phuah dih hna. Cozah thar Consulate an dirh. Mah
hi cozah thar ahhin ‘Consult’ pathum an um. Napoleon Bonaparte, Sieyes le
Pierre Rogr Ducos hna an si. Mah bantuk cozah i hruainak hi hlan chan Rome hna
nih an rak hman ve cang. France mizapi hna zong nih an cohlan ve ko ti’n theih
khawh a si.
Consult
hna nih ram an hruaining: Atu
ahcun Napoleon zong kum 30 a si ve cang. Mi
pate a si pinah taksa pan hirhiarte a si fawn. Asinain mizapi nih an upatmi le an zumh ngaingai mi a
si. Raltuknak hmun tampi ah ral a
rak tei hna. Campo Formio mizapi he i remnak ttha taktak in a rak ser. France Revolution fapa a si i Voltaire fapa zohthlabik a si. Mah hi cozah
thar hi ralkap nih nawl a ngeihnak
cozah a si. Asinain ram phunghram nih an kilning cu a thuhpiak hna. Consult hna lakah pakhat Sieyes nih hi phunghram hi a tuaktan ngai ve i, 1799
December 25 ah cozah nih mah
phunghram cu a fehter.
Mah hi phunghram thar nihhin consult
ah bawibik (First Consult) cu nawlngeihnak sangbik a pek i, a ttuanpi consult
midang pahnih hna cu a min in ai vai i tel ve men khi an si. First Consult,
Napoleon nih cun minister hna le General hna le cozah hruaitu dang hna,
magistrate hna le council of state member hna, cun Legislative Assembly thimnak
kong hna ah nawl a ngeih hna. Mah hi ram phung hi 1800 kum ah mizapi nih an duh
le duh lo cuaitlai a si i mizapi hnatlaknak in fehter a si.
Napoleon nih mirang holh a cawn i miring
thawngthanhnak ca news tete hna cu a rel tawn hna. Napoleon cu a ngandamnak a
tthat lo caah cu hlan i nichuah, nitlak, chaklei, le thlanglei a hlat tawn mi
zong kha a ngandam lo ruangah a tlawngkai kho ti lo i, inn ah ihkhun cungah
caan a hmang cang.
Napoleon a thinlung fahnak a zualtertu
bik cu a nupi Maira Louis hi a si. Austria cozah nih Napoleon va zohkhenh dingin
Graf Adam Von Neipperg cu an chiahpiak. Amah zohkhenhtu dingah an chiahmi pa cu
Napoleon nupi nih a duh ziar i a thli in an i ngei diam. Napoleon a nupi le a
fapa cu Austria Vienna ah an um i, Napoleon hi tluk minthang le milar cu St.
Helena ah lungkuai lileng umhar in a um.
A nupi le a fapa hmu kho loin khua a
sa ruangmang. British cozah nih St. Helena governor caah an chiahmi cu Sir
Hudson Lowe hi a si. Mah hi governor nihhin Napoleon nun khua nuamh nakding hi
tlawmpalte hmanh an tuaktan piak lo tikah Napoleon cu lungrawk in a um. Napoleon
secretary Las Cases le Sir Hudson Lowe cu an i rem lo ngaingai. Governor nihcun
Napoleon a dawtu paoh cu a tlaih hna i St. Helena hmun in a tthawl hna.
Napoleon le Governor cu an nunchung ral ah an cang thai.
.jpg)
1817 kum donghlei ah Napoleon a
damlonak zual hram ai thawk. Pawpi Khenser (ulcer) zawtnak a si ko tiah a fahnak
le tuarnak zoh in chim khawh a si. Amah zohkhenhtu Dr. Barry O’ Mear nih
Napoleon a dirhmun ttha deuh in zoh dingah cozah a chimh hna caah; cu hmun in
amah cu an tthial diam. Amah ai-awhtu ah John Stoke an chiahmi zong Napoleon a
zohkhenhnak a tthat tuk caah a rannak in an tthial colh ve. Zohkhentu
anchiahpiakmi siibawi pathumnak cu Corsican a si. Cu pa nihcun a dam khawh
nakding caah sii-ai ttha a pe duh loh. Mah caan lioah sii lei thiamnak ah an
sang deuh rih lo maw a si, Napoleon hi dam khawh ding a si lo ruangah dek a si
hnga tihi theih khawh a rak si lo.
1821 kum thokka ah Napoleon damlonak
cu a zual hma ngaingai. March thla thok in a zual chin lengmang i, April ah
biaro a vuihmi a ttialter hna. “Ka ruak dap hna cu Seine tiva kam ah ka dawt
tukmi hna France mizapi hna sinah dinhter ka van duh hringhran dah!! Mirang ram
hruaining le a ka thattu ding i an sawmmi hna cu khika ah khin ka thi cang lai
a si hi” tiah a chimh hna. May 5 ni ah hmawhmang loin hi bangin bia a chim “Ka
Pathian..... France miphun...... Ka fapa..... ralkap bawi .....” tiah a ti.
Mah hi ni zanlei sang suimilam 5 ah
vawlei miroling pa cu a nunnak a ciam ai. A uniform ai hruk duhbik mi cu an hruk
i Marengo i an rak i tuk lioah ai hrukmi a angki cu a ruak khuhnak ah an hman.
Amah vuinak caan hi sunglawi lo ngai in an tuah i Rupert hmunrawn a pal tawnnak
tivate kam Willow thingkung pahnih pawng ah an vui. A thlan khuhnak lung ah
thildang zei hmanh ttial loin “Cigit” (Mahka hmun ahhin a zau. Here lies) ti
lawng an ttial. Napoleon a thih hnu caan raulote ah amah dohnak cauk le amah
thangchiatnak cauk zeimaw zat an chuah manh. Mah cu lak ah cun Royalist chungin
Francois de chateaubrand zong nih a ttial ve.
.jpg)
Asinain, Napoleon a thangchiatnak nih
caansau a nguh lo. Napoleon an thangtthatnak le an cawnglawmhnak cauk tampi a
chuak i biazai tampi zong ttial a si. Cu chungah mirang hlaphan minthang Lord
Byron tehna, German hlaphan thiam Heinrich Heine hna hi an si. Cattial minthang
tampi nih Napoleon a tuanbia hna cu ngaih nuam taktak in an ttial rih fawn. A
thih hnu ah a minthan ai timh khi a si. Cun Napoleon a chanchung a tuanbia le
Napoleon a minthannak i lak in tuanbia tampi an chuah chin lengmang.
1830 July Revolution a rak chuah hnu
le bang khan cun France mizapi nih Napoleon cu Pathian bantukin an biak dengmang
khi a si. France cozah zong nih a thawng daihter cu chim lo an upatnak tu kha
an langhter deuhdeuh. 1833 kum ah Napoleon Alem lian taktak in an ser i Paris-a
Place Vendome timi hmun ah an dirter. 1840 kum ah France siangpahrangpa
Francois nihcun raltuknak Tilawng lianpi he St. Helena panh in a va kal i Napoleon
a ruhro hna cu a va lak hna. A bia roca ah a duh bantukin Seine tiva kam ah cun
a phum tthan. Napoleon an sianlonak langhternak caah pumh khawmhnak Paris ah December
1840 kum ah an rak tuah. Napoleon cu a nunnak ciam hmanhsehlaw a raltuk
thiamnak le a raltthatnak cu vawlei dongh tiang a hmun zungzal ko lai.
-----------------
Note: Vawleicung Miroling cauk (By Mang Hlei Cung)chungta lakchinmi a si.
No comments:
Post a Comment