ABRAHAM LINCOLN (1809-1865A.D)

“Thilttha lo ai tel lomi cu kan dihlak caah sifak rethei bawmhnak a si, Pathian nih thilttha a kan hmuhter bantukin kan dihlak kan rian dih dingah i zuam hna sih, hmunkhat ah ram hliamhma tuam hna usih”

Lincoln cu February 12, 1809 kum ah Hodgenville, Kentucky ah a chuak. Lincoln le a chungkharnih harsatnak tampi an ton. Cu caah pawcawmnak le fimcawnnak leiah harnak an tong ngaingai. 1816 kum ah Lincoln te chungkhar cu Indiana ah an i tthial. Lincoln nih lo ah rian a ttuan pah in fimcawnnak hi biapi ah a chiah i caanttha a hmuh paoh cawnnak ah a hman zungzal.

November 4, 1842 ah Mary Todd he an i ngei. Mary cu mirum chungkhar Kentucky mi a si i annih cu minung sal ngeimi chungkhar an si. Lincoln le Mary Todd nih fapa Robert Todd, Edward Baker, William Wallece le Thomas Tad an ngeih hna.

1846 kum ah Lincoln nih United State House of Representatives ah ai zuam i teinak a hmuh. Washington a um lioah Lincoln cu U.S. le Mexican ral (1846-1848) ah a rak thomi a dohnak hna thawngin midang nih an hngalh. Mah hi ral a dohnak hna cu Lincoln nih sal zuatnak karh ding a hmuh caah a si. Mah hi ral ai thawknak cu Republic of Texas kha U.S. state chung ah an rak luhnak in a si. Mah ral cu U.S. caah avoi khatnak ramdang ralthawhnak a si i, state kip in ralkap pawl Robert E. Lee, Thomas J. ‘Stonewall’ Jackson, Ulysses S. Grant le William T. Sherman an i tel hna. Mah hi minung hna cu ramchung ralthawhnak ah biapi in ai telmi pawl an si hna.

Lincoln cu ramkhelnak le a dang salzuatnak he pehtlai in a ngaihchia ngaingai. Kansas-Nebraska Act nih 1854 kum ah Lincoln ramkhelnak tel dingah thahrimnak a pek tthan. Mah hi Act nih nawl a pekmi hna cu hi hmun hnih ah mah duhningte in salzuatnak hi an duh le ngeih, duh lo le ngeih lo ding ti a si. Mah hi nih Kansas ah dohnak fakpi in a chuahter i mitampi nunnak a liam. President Franklin Pierce nih dohnak daihternak dingah Federal ralkap pawl a kuat hna nain salzuatnak kongah elnak/duhlonak cu ai peh peng rih.

1856 kum ah Lincoln cu Senate caah ai pe nain a sung. Kumhnih hnu ah Senate tthutnak caah Stephen A. Douglas a zuam tthan, sihmanhsehlaw a sung tthan. Hi Senate caah bia-elnak (debate) an ngeihnak thawngin Lincoln cu biachim thiam leiah mintthatnak a hmuh. 1860 kum U.S. President thimnak caah Republican in ai zuam nain thlanglei minung pawl nih salzuatnak kongah ruahnak a ngeihmi ruangah an duh loh. A donghnak ah party nominee caah ai zuam hawi i, Hannibal Hamlin he thim an si. Cuticun Abraham Lincoln cu November 6, 1860 ni ah avoi 16nak U.S.A. President caah Douglas, John Bell le John C. Breckinridge a tei hna hnu ah thim a si. Thlanglei vote petu pawl cu hi minung 4 candidate vote an pekmi hna ai tthentthek cio i Lincoln nih teinak a hmuh.

February 1861 ah Lincoln le a nupi Mary cu tlanglawng in Washington, D.C. kal an i thawh. March 4, 1861 ah Lincoln nih president sinak biakamnak a tuah. Thlanglei peng mitampi nih Lincoln thim a si ahcun Union (pyitaungsu) in kan chuak lai tiah an chimcia mi bia a rak um. Thlanglei pawl nih Lincoln an duhlonak cu Lincoln nih salzuatnak a doh caah a si. Carolina cu a voikhatnak Union in a chuakmi an si i December 1860 ah an chuak. Cu hnu ah a dang Mississippi, Florida, Alabama, Georgia, Louisiana le Texas nih an van zulh colh ve. Lincoln president tlinnak an lawmh hnu ah Virginia, Arkansas, Tennessee le Chak Carolina nih Union in an chuak ve. Mah hi peng pawl cu Confederacy (Ikomhnak) tiah theih an si. Avoikhatnak bik ramchung ral/dohnak a chuah cu Thlanglei peng pawl nih Union in an van i tthen hnu, Thlang Carolina ah April 1861 in ai thawk.

U.S. president lakah Lincoln nih ramchung buainak fakbik a ton tiah an ti tawn. Amah nih raldohnak le thihnak hi a huat tukmi a si. Asinain dohnak pakhat lawng nih Union tthennak hi a kham khawh, a sersiam khawh tiah a cohlan. President sinak lawmhnak ah Thlanglei pawl hiti hin ralrinnak Lincoln nih a pek hna. “Ka cungah ai lungsak lomi ka rampi hawile hna, keimah ah siloin nan kut in ramchung ralthawh nakding nawlchuahnak a um. A cozah nih tthatlonak a tuah lai lo.

 

Vancung ah nangmah nih cozah hrawhnak dingah chiatserhnak theihpi mi nan ngei lo. Cu lioah keinih cun himte in chiah ding, dirkamh ding le humhak ding kai tim,” tiah Lincoln nih a chim. Ramchung ralthonak kumthum linsapur in a si hnu ah President Lincoln nih Luatnak nawl peknak thawng 1 January 1863 ah a thanh. Mah hi thawngthanhnak cu hiti hin a si “Sal ah tlaihmi vialte ramchung dohnak peng pawl chung ah a ummi luat nan si cang” ti a si.

Mah hi thawngthanhnak nih minung tlawmte lawng luatnak a pek hna. Ramri peng pawl Missouri, Kentucky, Maryland le Delaware pin ah thlanglei peng Union uknak tang ah a um cangmi hmun hna zongah hi nawlpeknak cu atak in a tling kho loh. Sihmanhsehlaw hi thawngthanhnak nih a langhtermi cu America ram nih sal zuatnak donhgter dingah a doh timi kha a si. Mah hi luatnak thawngthanh mi nih sal pakhat te hmanh atak in luatnak a pek lo nain ral dohnak tel dingah minak phun (Black) pawl lam a onpiak hna. Minak phun pawl nih Union ralkap le Ti lei ralkap ah an lut kho. Ral dohnak a dongh leiah ralkap le tilawng mawngtu ah minak phun 200,000 an um cang i Union sersiamnak le luatnak caah heh! tiah dohnak ah an i tel ve hna.

November 19, 1863 ah Lincoln nih Gettysburg le Pennsylvania ah biachimnak a ngei. Ralkap pawl hika hmun ah nunnak a liammi hna upat a rak pek hna. Hi hmun raldohnak cu ralkap thlanmual ah a cang. “A donghnak caan kan phan. Hika hmun ah nunnak a liammi hna hi pakpalawng a si lai lo. Kan ram nih Pathian hruainak tangin luatnak hrintharmi a hmuh lai” tiah Lincoln nih bia roling a chim. 1864 kum ah Lincoln cu President ah thimtthan a si.

Hi lioah Union raldohnak dihlei a phanh cang. President cu Washington in Virginia lei a tlawng. Hi hmun ah ramchung tthennak i fonh ding kongah ceihhmainak a ngeihpi hna. Lincoln nih daihnak le ramchung fonh tthannak caah a tthabik lam a duh. Lincoln nih daihnak hi a duh tuk hringhran. Thlaklei minung raltho mi pawlan hriamnam cia in ramchung ah i fonh tthan dingah Lincoln nih a sawm hna. Lincoln nih ralbawi Grant sin in Petersburg le ralkap dangin a dirmi Ralbawi Robert E. Lee hruaimi hna pawl sinin teinak an hmuhnak thawng theih ding a hngah ko. Mah hi lioah Lincoln cu Virginia leiah Tilawng in khual a tlawng.

Hi lioah Lincoln nih mang a manh. Amang cu innrangpi ah a chawk i cu lioah ngaihchia in a ummi mibu a hmuh hna tikah ralkap pakhat kha zei ko dah a cang tiah a van hal tikah “President” a thi tiah ralkap pa nih a leh. Lincolh nih mang a manh in ni tlawmpal ah Petersburg, Virginia an lak i ralbawi Lee nih ralbawi Grant sinah nan kan tei cang ti’n apnak a tuah. Cu ticun ramchung ral a dong. Lincoln nih ramchung ral donghnak a duhmi cu Virginia ah Lee teinak an hmuhnak nih a tlinter.

Sihmanhsehlaw Lincoln nih ramchung daihnak taktak a nunnak nih a tem manh loh. A ruang cu Virginia in Washington, D.C. a kir hnu ah Lincoln nih mang a manh bantukin a nunnak a liam ding a si. Lincoln U.S.A. ram President an thimtthannak nih United States ram hmailei miphun sining a thlen ko nain khatlei ah John Wilkes Booth timi pa cu Lincoln cungah a thinhung tuk i Lincoln tlaih le thah dingah timhtuahnak a ngei. 14 April, 1865, Robert E. Lee nih ralbawi Grant sinah apnak a ngei hnu ah Lincoln cu ‘America rammi kan Chung’ timi cawlcanghnak (zoh nuam) an tuahmi zoh ah Wishington khua ah a ummi Ford Baisikup ah a kal ve.

Booth cu cuka Baisikup zung ahcun a va lut i Lincoln cu bisatol in a kah. A thaizing 7:22 zinglei ah Lincoln cu a liam ruangmang. Hi lioah Lincoln cu kum 56 a si. President Lincoln thiltuahmi lakah a tlamtlin bikin ruahmi le pommi cu America ram in a chuakmi pawl Union ah an luh dih tthanmi le sal pawl nih luatnak an hmuhmi hi a si.

“Thil`halo ai tel lomi cu kan dihlak caah sifak rethei bawmhnak a si, Pathian nih thilttha a kan hmuhter bantukin kan dihlak kan rian dih dingah i zuam hna sih, hmunkhat ah ram hliamhma tuamtti hna usih.”

                                    ........................................

Note: Vawleicung Miroling cauk (By Mang Hlei Cung)chungta lakchinmi a si.