Zeitindah Kan Fale Kan Tthanter Hna Lai?

Biahmaithi:  Bongva Megazine caah ka u Salai Lai Ram Thang nih capar rak kan ttialpiak ve tiah a rak ka sawm i kai lawm tuk! Zeikong dah ka ttial lai timi ka thinlung ah biatak tein alnak a um. A ruang cu ka santlaih lo buin kan miphun caah ka saduhthah a tampi ve. Nai hrawng thawngpang ka theihmi le ka tonmi nih ka lung a ka suk ngai. Kan hnu lei ah US um Chin hngakchia minung pahra sualnak an tuahnak kong ka rak rel. Cun Delhi ka umnak hngakchia le tleirawl pawl thil an fir tuk. India miphun he an ibawm i a group in thil an fir. Inn an bauh. Sii an ri, zuu an ding, an hmailei nunnak kong ruah tikah kan miphun caah ngaihchia tuk a si. Cucaah  “Zeitindah Kan Fale Kan ~hanter Hna Lai” timi tlangtar  ka van i thawhnak a si.

 

Hngakchia Sining : Sii lei thiamsang pawl nih  an chim ning ahcun nu pawchung i a ummi hngakchia nih cawnpiaknak an theih khawh i an cohlan khawh cang tiah an ti. Cucaah nau pawi lio ah nu nih a fa siter a duhmi kha tuah ding a si. Bawi Jesuh kong relpiak ding, mi`ha, mi duhnung kong relpiak ding tbk. A tampi.  Book of Education (For Student of  University Classes) i aa tthenning cun a tanglei bantuk hi an si:-‍

 

1. Bawhte le Ngakchia no (Infancy) kum 0-5 karlak : Hi lio caan hi an thinlung catlap raang bantukin a thiang. Nu paw chung hmanh in cawnpiaknak a thei kho hngakchia nih an hung chuah bakin thil an theih khawh i an icinken khawh dih. An mit in an hmuhmi le an hna in an theihmi thil paoh cu an thinlung a thiang mi chungah cun an `ial dih. Cucaah nu le pa nih bawhte siter an duhmi kha an nunnak le an tuahsernak in `ial a herh.

2. Ngakchia (Childhood) kum 6-12 karlak : An thluak a `hat lio caan a si. Zeithil paoh theih an duh, hngalh an duh. Nu le pa kha an thinlung dihlak in an ibochan. Nu le pa hi vawlei cungah a `hawng bik, a thiambik, a hngalbik ah an ruah hna. Hi lio caan ah nu le pa nih hngakchia fale deuh lo dingin um kha  a biapi bik.

3. Tleirawl (Adolescence) kum 13- 18 karlak : An pum a hung ngan ngai cang. Puitling pumrua le thazaang an hung ngei kho. Zeizong te a tuahkhotu si an duh. Milar si an duh. Cucaah siter na duhmi milar, minthang pawl kong kha zohter le relter ah a `ha.

Zeitindah kan fale cu kan cawnpiak hna lai : Kan nih Chin miphun cu fa `ha ngeih cu kan duh. Asinain, fa `ha ngeihnak dingah tuah ding a herhmi tuah cu kan zuam lo. Kanmah duhmi paoh kha kan tuah. Kan fale nih zei an tuah ti kan thei lo. Fale cawnpiaknak kong ah vawlei cung minthang hna nih an chimmi, biatawi tete a tanglei ahhin kan van zoh hna lai.

John Grun : " Kan fa le hna hi an duh na loin kan firter tawn hna i, hlawh kan hlanter tawn hna." ati. A chim duhmi cu kan fale hna hi an hngakchiat lio tein kan cawnpiak hna lo caah a si a ti. 

D. L Moody : " Ka nu nih a ka thithruai bantukin nu nih hin an fale hi zohkhenh cio hna sehlaw, thong inn hi um a herh  lai lo" tiah a ti. Nu le nih fale tha tein zohkhenh ahcun vawlei cungah sualnak hi a tlau kho. Misual hremtu le cawnpiaktu um a herh lo a ti duhnak  a si.

‍‍John Randolp : "Ka nu nih ka kut pahnih in a ka tlaih i zingchiar te Bawipa thlacamnak in a ka cawnpiak caah ni hin ni i Khrihfa ka si nak hi a si a ti. Cu lo ahcun Pathian a um lo a ti tu ka si hnga" tiah a ti. 

Napolian : "Kan herh bik mi cu nu`ha hi a si. Nu `ha pakhat cu Saya tha zakhat he an i tluk "tiah a rak ti.

Thah dingmi hngakchia pa : Voikhat ah tlangvaal pa thah ding mipa hi a hodah hmuh na duh bik tiah an hal. Ka nu hmuh ka duh bik tiah a leh hna. A nu cu an kawhpiak i a nu cu a mitthli tla buin a ra. A nu sin ah a chimmi cu “A tu ahhin biaceihzung biaceihtu ruangah thah ka si lo, nangmah ka nu hrimhrim nih na ka thah” tiah a ti. Ka hngakchiat lio i, thil ka hmuh tiah inn i ka rak tlunh tawn mi kha na rak ka lawmh i cu nihcun fir thinlung a ka putter. Cucaah ka fir i, thah tiang ka huahnak hi a si” a ti. A nu caah  tlai tuk cang. A poi ngai ko "Hngakchia thlahthlam mi nih cun nu le pa ningzahnak a phakter tawn" tiah phungthlukbia 29:15 ah kan hmuh mi hi a hman ngaingai ko. 

A pa  nih a pawngah umter a duh lomi hngakchia pa:‍ Hngakchia pa pakhat belte a pa pawng ah a umter duh lo. A nupi he caan `ha hmuh peng a duh caah a phenhei peng. Inn zongah ihnak khan a dang tein a tuahpiak. Cucaah a nu le a pa nih sualnak a tuah zong an hngal tawn lo. Khualu khuataw aa chawk tawn.  A nu le pa sin i um a duh tawnmi kha a um ngam ti lo i vahvaih in caan a hmang. Zuu a ding, phe aa kah a duh paoh in aa nuam cang. A donghnak a nu sinah a chim mi cu " Ka nu ka pa hi chim te, amah loin um ka thiam tuk cang, hi hnu ahcun hung ka chim hmanh u law nan ka chim kho ti lai lo." a tiah a ti. Mi cheukhat nu le pa cu kanmah nih caan `ha hmuh kan duh ruangah kan fale hna hi kan theihlonak hmun ah kan umter tawn hna.

Mahadamah Gandhi : South Africa a um lio ah a fapa Arun kha zungah ka kai lai i na Motor hin hung ka thlah. Cun Workshop na Motor kha na va remh lai i zanlei Suimilam 5:00pm ah na ka don te lai tiah a ti. Arun nih  a pa a thlah khawh in  Motor cu Workshop ah a va remhter. Suimilam a zoh tikah caan tampi  a hlei rih Biscop puai khat a zoh i a dih.  Suimilam a zoh i 3 lawng a si. Puaikhat a zoh`han i a dih tikah cun Zanlei Suimilam 5:00pm a luan cang. Rianrang ngai in Motor cun a tli i a pa cu a va don. A pa cu lam kam ah a rak dir. Ka pa a tu naite kha Motor an remh thlu tiah a hlen. A pa nih  Workshop ah phone ka set cang hna Zanlei Suimilam 3:00pm ah kan lim cang tiah a ti. Hlenhmang mi fale ngeih cu keimah palh a si. Cucaah na Motor kai cit lai lo tiah a ti i Gandhi cu a keden kha aa phoih Suimilam pathum chung ruahpi sur lakah a ke in  a kal. A fapa Arun nih cun a pa cu Motor mit in a ceuh i a hnu tein a zulh  a pa a harsat tuk kha hmuh tikah Motor Stearing kha cumh pah buin ka pa ka hleng ti lai lo tiah a ti. Cucaah nu le pa hna, kan fale hlen an hman hi kanmah palh a si.

‍Lawng Mongtu : Christian Family cattialtu Larry Christian nih America ram Biscope film pakhat an chuah i cu Biscope cu 1912 kum i Titanic lawngpi  Vur tlang pi a suk ruang i minung 2000 reng lo rili chung i an pilnak kong kha s i. A zohtu paoh nihcun a va poi ve! Hi lawngpi a mongtu hi a hodah a si hnga tiah an i ceih supmap ko. Cubantuk in  nu le pa hi fale hmailei an nunnak ding caah Lawngpi a mongmi bantuk kan si i fanu le fapa hna hmailei an nunnak lamthluan a hrawk i ti chungah a pil tertu hna caah cun ngaihchia ngai a si.  

Crusade le Camping : Chin miphun hi biaknak lei ahcun kan ipe ngang. Crusade le camping cu kan uar taktak. Fale anmah lawng chiahta in crusade le camping ah kan kal. Pathian bia kan ngai kan ti karah kan fale zeidah an rak tuah kan thei lo. Tangka tampi dih in Camping kan tuah. A `ha tuk! Asinain, kan fale `hatnak dingah a herhmi cawnpiaknak tuah le an herhmi tuahnak ahcun kan phaisa kan siang lo, kan caan kan si lo i a tuah zong kan zuam fawn lo. Hngakchia kong cawnpiaknak kan theih ballo caah nu le pa nih hngakchia cawnpiak ning kan thiam lo. A ruah awk zong kan thei lo. Kan fanu le fapa an sual tikah crusade le camping ah kan chiah hna. Crusade le camping nih an nun a remh  kho taktak hna lo caah an chanchung crusade le camping ah chiah peng hau dirhmun kan phan. Nangmah cu vawlei cung thawng`hachim thiambik zong si, Doctor voi hra zong la, President le Chairman voi 20 zong `uan law, na fale ningcang loin an um ahcun ningzak ngai na si.

Tlangkawmnak : Phungthlukbia 22:6 “A zulh awk a si mi lam kha hngakchia cu cawnpiak law mah cu cu a upat tikah a pial tak ti lai lo”. ti kan hmuh. Hngakchia cawnpiak siseh, midang cawnpiak kan duh tik paoh ah hmurka in cawnpiak si loin a hruai in hruai. Asiloah, an lam kha a sial in sialpiak. Tiluannak dingah mipa nih tilam a sial hnu lawngah ti a luang tawn. Cu bantukin kan fale hna hi thilthalo an tuah tik paoh ah tuah hlah!, ti hlah! ti nakcun an tuah ding an zulh dingmi lamtu kha a sial in sialpiak i cu lam chungah kan nunzia dawh in caw hngarphaw vihmi hri in an hruai bantukin kan hruai hna ahcun sualnak lei ah an pial kho ti lai lo.‍

Stalin ~ha Cung Lian

Dr. Hla Aung I Tonnak

Deirel: Na chuahkehnak, Sianginn na kainak, rian na tuannak kong tawifiannak in na ka chim kho hnga maw?                                                                                                 

HLa Aung: Ka Pa Bualtak, Ka nu Hakha, ka chuaknak hi Hngachawng,Sianginn hi tanghra tiang, Hnachawng ah ka kai i Hakha ah ka awng, Yangon Science University ah ka kai i Science degree ka dih, cu hnu ah Bible sianginn kai i B.D ka dih, cu hnuah Germany ka peh than i cu hnu ah Laitlang ah ka tlung i Hakha ah CCC ah Principle le CACC General Secretary ka ttuan..                                                                                                                  

Deirel: Atu na dirhmun na phak khawhnak dingah hin na rak i zuamnak le harnak na tonmi na philh khawh lomi kong tete na kan chim kho hnga maw?         

Hla Aung: Kannih kan ralkap cozah nihhin mirangholh, cawn loin a hrawh dih tikah tanghra kan awn ka tiangte hna hi cu mirang kan rak thiam kho ti lo i University kan kai tiang hna zongah kan thiam kho ti lo, heh! tiah mirangholh kha zohthan kha  a har ngai ka rak ti ve, cun Germany ah sianginn ka va kai than tikah Germany anmah Education, an holh kha cawn hmasa lo cun a ngah lo, mah German holh cawn i awng kha a hartuk tiah ka ruah.                                                                                                                                                                       

Deirel: CACC Laica nan tawlrelnak ahhin lohma kan kalpi khawh cang tiah nan ruahmi hi zatuak (%) in zeitluk khi dah kan phanh cang tiah na ruah?    

Hla Aung: CACC nih atu tiangah keimah ka hmuh ning ahcun Laitlang ah (35%) hrawnglawng hi kan ti khawh rih rua tiah ka ruah., tc. nak ah Laica ttialnak le word competition, biazai lei he pehtlai zong in a ningcang le phunglam te zongin ai tuah kho rih lo, tadinca chuahnak Laica lei rianttuannak zong tampi tuah ding a um rih i ai tuah kho rih lo, cucaah laimi kip nih ca lei rianttuannak hi biatak tein thazaang chuah a hau tiah ka ruah.   

                                                                                       

Deirel: CACC nih tuan awk rianthar (Project) nan timhlamhmi tete chim awk a tha hnga maw?            Hla Aung: Aw!......Project thar tuan ding cu a tampi ko, cu lakah Strait Siangbawipa nih a rak leh mi Bible biakam thar kha, a tuchan holh umkal ningin a holh kha remhthan i atu biakam hlun chung i salm le phungthluk he komh tti in zalsenh cauk te khin chuah ding kan itim, cun a pahnihnak ah Bible Enpsyclopidia chuah kan i tim i 85% cu a dih cang.    

                                                                                               

Deirel: “Ecumenical riantuannak” timi kha a tawinak tein zeidah a si?                               

Hla Aung: Ecumenical rianttuannak timi cu Khrihfabu kip lungkhat tein hmunkhat ah rianttuanttinak ti khi a si ko.Cucu CACC nih ai tinh mi a si i, atu tiangah cun tampi ecuminical hi a tuan kho rih lo atu tiangah bu dang aitel kho mi cu UPC, Mothodisth, Presbytherian, love in action, Gangaw peng i tuah mi Grace mission riantuannak hna an i tel. Cucaah Ecuminical riantuannak hi tampi thazaang chuah a hau rih. 

                                                              

Deirel: Theologian si khawh nakdingah zeibantuk minung si dah a herh?                           

Hla Aung: Theologian sikhawhnak dingah pakhatnak ah a herh bik mi cu thlarau nih a hninhsaih ciami, zapi nih hmuhkhawhmi nakleng khin thuk deuh in va hmuh khawh i va zohmi fimthiamnak kha a hau tiah ka ruah, cucu cawnmi degree he zong ai san theng lo, cu si caah cun Doctor degree ngah loin vulei cungah min thangthang an tampi, cucaah lai thluak cun nuhrin thluak fimnak kha a hau.  

                                                                                            

Deirel: Bible hi background thei lopi in sermon tuah hi zeitluk in dah a poi/ poilo, na ti?    

Hla Aung :A tthatnak ahcun Bible background theih hmasa i zuam i chim ahhin a ttha bik tiah ka ruah, zeicatiah Bible hi a background theih lo cun Pathian bia hi a thuuk tuk caah chim sual hi a fawi tawn.                                                                                                               

Deirel : Bible hi a biafang (word) maw a biapi deuh/a sullam (Background) dah a biapi deuh?

Hla Aung: Background a biapi deuh. Zeicatiah a biafang hi a background he zoh in ttialmi a si caah a si.  

                                                                                                                 

Deirel: “Zumhnak tling (Perfect faith)” timi hi a tawinak in  zeidah a si?                

Hla Aung: Zumhnak tling timi cu Efesa chungah Paul nih a chim bantuk khan Khrihfa he aalomi lungput ngeih i Khrih i nun khawh kha zumhnak tling timi cu a si ko.    

                    

Deirel: Delhi Laihritlai Khrihfabu caah cawlcanghnak/riantuannak thar hihi, cucu van ti kho ulaw,timi duhpiaknak na ngei el maw?                                             

Hla Aung: Um ko, Pakhatnak ah Delhi ummi kan Laimi Khrihfabu pawl nih hin Laitlang caah rak tuah kho hna sehlaw ti ka duhmi cu thlanglei Laitlang Kanpalat, Mindat , Paletwa ahhin khuate lei i sianghngakchia a sifak ngaimi pawl khuapi ah fawite in an rak kai khawhnak ding caah CACC he i bawmtti in riantuan tti hna u sih ti ka duh. 2. Hakha i a ummi CCC Bible sianginn le Matupi a ummi UTC bible sianginn hi biatak tein thlacampiak hna usihlaw phaisa thazaang zongin bawm kho hna usihlaw ka duh piak hna. 3. Tangka thazaang nih a chei rih a si ahcun kan Laitlang ah mino nih heh! tiah  ca an i zuam i cu hlan ah an hmuh khawh lomi sipuaizi thiamnak cawn khawhnak tehna hi an hmu kho mi an tampah cang, asinain a chel caan ahcun nu le pa nih tangka thazaang in an kaiter khawh hna lo caah Delhi ummi Khrihfabu vialte he i komh in minung pakhat tal hi sipuaizi thiamnak a dih tiangin cawnter kho hna seh law ti ka duh ngai.                                                                                                                                             

Deirel: Ramdang kal ding Laihritlai kan um tikah Vanlawng bual (Airport) ah khatthup in kan i thlah tawn, kan nunphung a si, kan i siang lo, kan i tah, hi hna hi miphundang lakah zoh remlo a si sual hnga maw?                                                                                                        

Hla Aung : Vanlawng bual tiang thlah zong cu a tha ko lai natein, Bus hlan man hna tamtuk a dih tuk sual ahcun a ziah hi an inn in chuah hlan zongah thlah khawh a si ko lo maw, keimah hi laimi mino ahcun ramleng ah hmasa bik ka rak kal i ka rak kal lio zongah hin ka nu le ka pa zong ka cah hna lo, ka chungkhar hna zong ka cah hna lo, ka hawikom pathum li te  nih Yangon airport tiang an rak ka thlah i a za ko ka ti.hahaha...mah ti khan ka rak kal ve ko i, nihin ni zongah ramleng ka kal zongah zeitik hmanhah kai thlahter bal hna lo, kai donter bal hna lo keimah te lawng ka kal pengko. Mah kha za zong a long deuh, tangka zong a dih heu lo deuh tiah ka ruah. Anmah an umnak inn ahkhan va thutpi i va thlah cu a tha ko tiah ka ruah. 

                                                                                                                                

Deirel: Delhi um Chin miphun hi Community in Pa (8), Khrihfabu (30) leng in kan thu dir, zeitindah kar hlang usihlaw, a that hnga?                                                 

Hla Aung: Kei cu mah ti khan community 8 um zong kha a tha ko, khrihfabu tampi um zong kha a tha ko, amah belte kha community pakhat le pakhat aa daw lo, rian an tuan tti khawh lo  a si ahcun ngaihchiat awk a si hnga.Um ko hna seh pakhat le pakhat i theihter hna sehlaw upatnak ngei hna sehlaw Laimi dihlak a herhnak zawn ah riantuan ti hna seh law a tha tiah ka ruah.   

                                                                                                                      

Deirel: Delhi um laimi nih hmundang i lairhitlai u le nau nu le pa thihlohnak kan ton caan ah rawldumtinak tuah kan hmang i, hi ruahnak kongah na hmuh ning zeidah a si?                   

Hla Aung : Aw..! kan Lai nunphung i kan khrihfa zumhnak zong nih a kan cawnpiak mi cu a ngaihchia mi hna sinah va ngaihchiatpi hna law a lungalawmmi sinah va lawmhpi hna, thihnak timi hi minung kan nunnak ahhin kan tonmi  ngaihchiatnak vialte lakah ngaihchiatnak fak bik a si. Cu bantuk ngaihchiatnak kan ton lio ah tantakmi ngeihchia mi cingla rualchan Khrihfa nu le pa hawikom nih thutpi, ngeihchiatpi timi hi kan Lai nunphung zong nih a kan fial mi a si, kan khrihfa zumhnak zong nih a kan fialmi a si. Amah belte ngaihchia a tongmi chungkhar caah tangka lei dih heu mi a si nakhnga lo kha ruahpiak ahcun  a tha tiah ka ruah. Rawldumnak a va um hmanh ah ngaihchiatnak a tongmi nih rawl kha dangh loin, a dang a ngaihchiat pi tu hna nih khan tangka a dihmi chuah in rawldum ttinak hi tuah hna u sih law cucu kan pu kan pa le zong nih an rak tuah tawn mi cu a si, cucu a tha zong a tha tiah ka ruah. zapi nih thazaang chuah a si tikah zapi ca zong ah a fawi.    

                                                                                                                

Deirel: 1999 Chin Evangel Centenary lio ah, kan pa Steven pa nih “Chin mi cu lung i ruallonak ah San-Ching-Hmi bak kan si” a ti, Chin miphun lungpurupnak dingah a herh bik tiah na ruahmi zeidah a si?                                                                                               

Hla Aung: Kei zong mah hi ka khuaruah a har ngai  ve, kan Pa Steven pa nih a timi cu Laimi pahnih umnak ah ruahnak pathum a chuak a ti i, keimah ka ruahnak ahcun mah hi cu caan nih hin a damterte a hau tiah ka ruah. Hi damnak ding formula in a um rua lai lo tiah ka ruah, caan nih a kan kalpi lai i vawleicung i miphun dang hna an i hruaining le an sining kha kan van theih lengmang lai i mah khan aw.!........hi tin pei kan um ve a hau hi tiah tha tein an van theih ve te lai i a tha te lai. Cucaah hi zawtnak hi cu caan nih damter hnga dingmi zawtnak a si rua tiah ka ruah.                                                                                                                                               

Deirel: Delhi um Chin Ralzam hi ramdangah lan kho tung loin, lam laklawh ah kan i taartahaak, thil ti kho hawi le kom na ngeih mi sinah kan dirhmun hi va chimpiak awk a tha lai maw?                                         

Hla Aung:  Aw!.. kei cu UN lei rianttuan mi ka si lo tikah UN lei timi hi cu chimhpiak khawh mi kan ngei hna lo, amah belte hi ka i a ummi kan u nau le an thutdirnak, an sianginn kainak, zawtfah, harsatnak tibantuk tehna hi bawmhchanh khawhnak a um a si ahcun kan hawi le sinah chimpiak i Khrihfabu lei tu hna in tuaktan piak cu a hau rua tiah ka ruah.      

                             

Deirel: Kan miphun hi ram lengah chuah cuahmah a si tikah, Laitlang ah minung kan tlawm chin lengmang hihi kan miphun tlaunak/kan ci mihnak hna a si sual lai maw? Zeitin na hmuhning?            

Hla Aung: Aw!..... hihi cu a mah chantiluan a si tikah kan ram hi a har tuk tikah um ko u.! harnak hi ingko u!... va tikah ti awk hi a ttha ve lo, ramleng kal hi zeitimaw in kan i ning deuh  hnga maw tiin chuah cio a si i kham kha cu a tha hnga lo a mahbelte, kan laitlangah minung kan tlawmtuk, minung karh deuh a hau ti a si ahcun ramchung ummi hna zong nih miphun dawtnak lungput he nau tampi an ngeih khawhnak dingah a herhmi training cawnpiaknak hi tuahpiak lengmang ah a tha tiah ka ruah.                                                                                                          

Deirel: Pathian chaw, hi vawlei riantuannak ah pek hi a sual maw/sual lo? (tc.:a cheu khrihfabu nihcun an chawva kha community rianttuannak hna i va pek kha thil sual tuk ah an ruah. Pathian chaw cu Pathian pek ding, Sizar chaw cu Sizar pek ding) timi hna an um, na hmuh ning?                   

Hla Aung : Aaaa!.. sihrim ti..hahaha..A tawinak in kan chim ahcun atu i vawleicung i biaknak tthawng kan timi hna chaw vialte khi atu ramkip miharsa le tthanchonak rianttuannak zeimawzat cu ai tel. WCC zong nih hin biaknak lei lawng si loin tthanchonak le harsami nin-can deuhnak dingah zeimawzat cu a chuah ve fawn, cun nan fiang khawhnak dingah cun Laitlang i UNDP, UNICEF le atu Refugee bawmhnak vialte khi biaknak lei phaisa tampi aa tel. Cu hna rianttuannak cu a palh kan ti kho lai maw? Cucaah Khrihfa biaknak cu midang ca rianttuan le bomh kha a si tikah midang ca, vawlei lei rianttuannak organization dang i va pek khi a sual hrimhrim lo ti khi ka hmuhning cu a si.

Deirel: Vawlei riantuantu (Community upa, CRC upa, Pengtlang upa) hna hnomthurlak ummi ah an ruah/ an mah nih le mission rian kan tuan tiah an i ruah zeitin na hmuh ning?

Hla Aung: Hihi cu Laimi kan hung tthancho tikah cun an theih te ko lai. Vawlei rianttuantu hi Pathian nih a thimmi hna an si. Asinain, an rianttuannak ah Pathian duhning ttuan kha a si ve. Hei tuak hmanh u law, minung kan sinak ah vawlei rianttuan lo cun a si khawh ttung hnga lo, ttuan duh loin um viar hna sehlaw, zeitindah kan um lai timi zong khi hei ruah a herh, Cucaah  vawlei lei rianttuantu hi hmunthur cu an si kho lo, kan bible chungah zongah ramhruaitu hna hi Pathian thimmi an si, Pathian thim loin ramhruaitu si khawh a si lo. Cu Pathian thimmi hruaitu cu hnomhthur lak i riantuan mi kan ti kho hna lai maw.  

        

Deirel: Delhi Chin miphun chung 99% hi Bible cawng an si, Secular lei cawng mi kan tlawm ngai, hi hi zeitindah na hmuhning, zeidah kan miphun nih a herh deuh tiah na hmuh ning?

Hla Aung : Ka hmuhning cu Bible sianginn a cawngmi cu kan Laitlang chung a cawngmi hmanh hman cawk ding an si ti lo, cucaah Secular lei hi kan nau le nih biatak tein thazaang van chuah u law van cawng kho u law a ttha hnga, cucu kan ram zong nih a herh, zeicatiah kan ram hna hi van i thleng sehlaw Bible lei a cawngmi nih cun zeitindah ramhruainak le tthanchonak cu kan tuah khawh hnga. Cucaah atu kan ram sining cun Secular lei hi kan herh deuh tiah ka hmuhning a si. (keimah hmuh ning mu).

Deirel: Chin miphun caah tuahkho ning tiah saduhthah na ngeihmi na kan chim kho hnga maw?

Hla Aung: Ka saduhthah bik mi kanmah Laimi bakbak nih kanmah Laimi kan tuanbia heh!..... tiah hlathlai i tial hi ka duh bik mi a si. Nihin tiangah cun mirang pa tialmi, Kawlpa tial mi hi kan i bochan lengmang, kanmah tein nihin tiangah kan kawl rih lo kan hlat rih lo. 2. Tuluk lei ummi Hakha timi miphun le kanmah miphun hi pehtlaihnak a um hnga maw u le nau kan si hnga maw timi ka lung ah um ngai. U le nau kan si ko a si ahcun va pehtlai hna u sihlaw a tha lai tiah ka ruah, zeicatiah Hakha miphun hi u le nau a dawtukmi an si, vawleicung ah Million 70 ummi an si, an mah he i bawm in riantuan tti hna usihlaw a tha lai tiah ka ruah.   

                             

Deirel: Delhi um miphun hawi sinah biacah na duhmi a um maw?   

Hla Aung: Cah ka duhmi Pathian hi fakpiin van zum ulaw, fakpiin thla van cam zungzal u ti ka duh. Pakhat le pakhat rak i daw u riantuan tti u, cun a lam a um ahcun lailei hi rak philh hlah u law lai lei Khrihfabu ngan deuh a simi CACC, CCC, UTC le ZBC he pehtlaih in riantuan kho u law ti kan duh hna. Kan nau le cah kan duhmi hna nanmah le nan umnak hmun cio University kip ah Scholorship programme hi an ngei cio dih, a cozah zong nih an ngei, mah kha nan mah tein rak hlat cio u law, University kip ah rak kai kho u law ti kan duhpiak hna.    

                                                                                                         

Deirel: Hawileng tampi na ngei ko nain caan na ka pek I kawi lawm tuk. Kei ka va tin ve rih lai.

Hla Aung  :Kai lawm tuk ve. Khah Mangtha ne.

By.Stalin Tha Cung Lian

Chief Editor

Deirel Journal