Father’s Day Le Mother’s Day Ai Tinhmi A Muru Kan Nganh Sual Maw?

Nihin Father’s Day Le Mother’s Day kan hman tikah hi upat peknak a rak tuahtu nih ai tinhmi a muru le a cozah tiang nih an hnatlakpinak a ruang kha kan ifian ve a herh. Hi upat peknak a rak thoktu kong cu chim lengmang a si cang caah ka chim lai lo. Asinain, ai tinhmi a muru le rampi cozah nih an pompinak a ruang le tuchun ni ah Father’s Day Le Mother’s Day kan hman ning hi zoh ta hna usih.

A rak thoktu nih ai tinhmi : A nu le a pa nih an rak dawtnak le an zohkhenhnak a hmuh tikah upat pek awk an tlak hrimhrim ti a hmuh caah a rak tuahnak a si. A rak thok tikah “fa dirhmun in nu le pa kha upat peknak a rak tuah”. Cu lawng a si lo, rampi nih maw, organization pakhat khat nih pa dirhmun ah an ruahmi le a si lo ah fa a ngei kho lomi, nu le pa dirhmun in a tthu dirmi, cawmmi a ngeimi, mi pakhat khat nih ka pa/nu tiah a kawh, a ni a si, a ttang, a pu, a pa ei a si zongah, a siloah fa le ngei lo nih fa an i cawm i cu an fa nih ka pa tiah kawh khawhmi dirhmun a phan khomi vialte zong kha hi upat peknak ahhin an itel dih.

Tuchun ni Father’s Day Le Mother’s Day kan hman tikah a rak thoktu a duhnak kan nganh mi thil tampi an um. Cu lakah pahnih langhter ka duh. Cu hna cu:

1.Father’s Day Le Mother’s Day ah nu le pa dirhmun in a dirmi nih caan kan hman. Kanmah tein upatnak kan ipe. Mah tein upat peknak cu a sunglawi tluk in a sunglawi kho lo. Ilunghmuih awk zong a um lo. Zeicatiah thil sining in a si lo caah a si. Father’s Day Le Mother’s Day cu fale nih an si khawh tawk tein upat peknak a tuah awk a si. Cu a tuahmi chung teah nu le pa nih an ilawmh awk a si. Fa le nih upat peknak caan an theih lo ahcun cucu a mah palh khi a si ko.Zeicatiah fale nih nu le pa upatpeknak caan an theih lo cu nu le pa mawhphurhnak cungah aa hngat. A mah tein upatnak rak ka pe a ti awk a si hrimhrim lo. A fale a zohkhenhnak cungah a fale nih an lung an ifian i upatnak an pek awk a si. Tuchun ni ah kan mah tein upatnak kan ipe, kanmah tein nu le pa upat peknak a herhnak kong kan chim. Kanmah tein kan isunlawih. Hihi a rak thoktu nih ai tinhmi a si lo.

2.Fa a ngeimi lawng upatnak kan pek hna: Hi kan tuah mi nih hin faktuk thil a hrawhmi a um. Cucu a tawinak in kan chim ah Fa a ngei kho lomi pawl dirhmun kha fak tukin an khuaruahnak a hrawk. Hi ni hi an nih caah ngaihchiatnak fak bik a tlun ni a si. Pathian nih a kan daw ve lo. Fale ngei kho lo dirhmun ah an kan dirter ti tiangin, Pathian sin zainak tiang hmanh an thinlungah khuaruahnak a um kho men. Cu lawng a si lo, nupi a tong lomi, pasal a tong lomi tampi an um. Cu an ton lo bu ah nu le pa dirhmun in a dirmi, inn chungkhar ah siseh, organization ah siseh, rampi ihruainak ah siseh nu le pa dirhmun in a dirmi tampi an um fawn. Cu hna cu teh upatnak kan pe ve hna lai lo maw? Kan pek hna awk a si. A rak thoktu zong nih a rak itinh mi a si.

Cucaah a cunglei i ka van langhtermi pahnih zeitindah nan ruah cio? Hmailei caan ah teh zeitindah kan hman lai. Father’s Day Le Mother’s Day tuahnak kong kan ceih lio ah a rak thoktu nih aitinh mi le a rak tuah duh hnawhchannak hi, hi kong a ceihkhang tu upa nih teh kan ifian maw? Hawi nih an tuah cio ti lawng hna in kan tuah ve sual maw? ti hi ruah awk a herh ngaingai.

Stalin Tha Cung Lian