CHINRAM KULH COZAH LE CHIN NATIONAL FRONT (CNF) KARLAK MINSENTHUT HNATLAKNAK

(Unofficial translation)

Zungzal a hmunmi remdaihnak ser khawh nakhnga Kawl ramkulh chungah zungzal a hmunmi remdaihnak a um khawh nakhnga Kawl ramkulh cozah nih 18 August, 2011 ni ah a chuahmi theihternak 1/ 2011 cherhchan in siseh, 18 August, 2011 ni ah Pyitu Hlutdaw le Amyota Hlutdaw pahnih hnatlaknak in sermi Ethnic Affairs and Internal Peace Committee nih a chiahmi rian a tak in dotkhat hnu dotkhat kalpi nakding ca ah siseh, Kawl ramkulh President U Thein Sein nawl peknak in, ramkulh vuanci U Aung Min hruaimi le Chin National Front a voi (5)nak Party Conference riantuan caan (term) chungah CNF Chairman Pu Zing Cung le Assistant Secretary General Dr. Sui Khar nih Thairam hmunkhat ah timhlamh chungnak me`ing an ngeih hnuah, Chin National Front a voi (5)nak Party Conference riantuan caan chung Central Executive Committee biachahnak 9/2011 cu Chin National Front tuahmi a voikhatnak Party Emergency Conference nih a fehter chap caah, cu Emergency Conference hnatlakpinak cu kalpi dingah siseh, Cucaah zungzal a hmunmi remdaihnak ser khawh nakding ca ah Chin National Front le Chin State level remdaihnak khuakhang laireltu bu hna nih tuanbia ah a hmun zungzal dingmi a tanglei hna cu kaphnih hnatlaknak minsen thut an si.

1. Chinram kulh cozah i Chin State level remdaihnak khuakhang laireltu bu le Chin National Front i Chin State level remdaihnak khuakhang laireltu bu hna nih raltuknak telhchih in pakhat le pakhat i huat le i kahnak cu hi hnatlaknak minsen thut caan thawk in kaphnih nih ngol colh dingin hnatlak a si.

2. Chinram kulh cozah i Chin State level remdaihnak khuakhang laireltu bu le Chin National Front i Chin State level remdaihnak khuakhang laireltu bu hna nih hi hnatlaknak minsen thutnak ah aa telmi pawl thawng ngai le rang ngai in hmalak khawh nakhnga ca ah Thantlang, Chin State chungah Iipehtlaihnak zung hun dingin hnatlak a si. Teddim le Matupi ah i pehtlaihnak zung hunnak kong he
pehtlai in a cunglei tuanvo ngeitu sinah chuahpi hnu ah theihter thante ding a si. Kahngol caan chung ah Chin National Front/ Chin National Army nih Thantlang peng chung ah a ummi Tlangpi Village Tract, Dawn Village Tract and Zaangtlang Village Tract ti’n Village Tract (3) ah caantawite chung umter dingin hnatlak a si. Cu pinah, Tedim peng Zampi le Bukphir Village Tracts, Paletwa peng Kung Pin, Para le Pathiantlang Village Tracts hna ah hmunhma khuarnak kongkau ah a cunglei tuanvo ngeitu sinah chuahpi hnuah theihter than ding a si.

3. Chinram kulh cozah i Chin State level remdaihnak khuakhang laireltu bu le Chin National Front i Chin State level remdaihnak khuakhang laireltu bu hna nih hriamnam aa ken lomi Chin National Front le Chin National Army cu ramkulh chung khuazei hmun paoh ah zalongte in khualtlawn khawh dingin hnatlak a si.

4. Chinram kulh cozah i Chin State level remdaihnak khuakhang laireltu bu le Chin National Front i  Chin State level remdaihnak khuakhang laireltu bu hna nih Union Level in ramkulh cozah le Chin National Front i hmuhton le bia i ruahnak caan le hmunhma sawh khawh nakding caah a ran khawh chung in i hmuntonnak ngeih dingin hnatlak a si. Cu bantukin Union Level in i hmunton le bia i ruahnak ding caah Three National Causes pin ah ramkulh kongkau, tlangcungmi kongkau le zauk phung a karhcho nakding kongkau cherhchan in i hmuntonnak le biaruahnak ngeih dingin hnatlak a si.

5. Chinram kulh cozah i Chin State level remdaihnak khuakhang laireltu bu le Chin National Front i Chin State level remdaihnak khuakhang laireltu bu hna nih Union Level in i hmuhton le bia i ruahnak tuah tikah Chin mipi ruahnak lakmi cherhchan in i hmuhtonnak le biaruahnak a um nakding ca-ah hi hlatlaknak minsen thut ri in Chin National Front le Chin National Army cu ramchung le ramleng ah a ummi Chin mipi hna he zalongte in hmuhton le biaruahnak (public consultation) tuah kho dingin hnatlak a si.

6. Chinram kulh cozah i Chin State level remdaihnak khuakhang laireltu bu le Chin National Front i Chin State level remdaihnak khuakhang laireltu bu hna nih Chin mipi nih an ton cuahmahmi eidin
champhannak, sii-ai champhannak, dinti thiang champhannak tbk. harsatnak pawl chungin chanhchuah nakding ca ah ramkip in cozah a si lomi bu NGOs (NonGovernmental Organizations) hna cu a cunglei i tarmi rian pawl Chinram chung le ramkulh chungah a nung cuahmahmi upadi he kalh lo in zalongte in tuan kho dingin hnatlak a si.

7. Chinram kulh cozah i Chin State level remdaihnak khuakhang laireltu bu le Chin National Front i Chin State level remdaihnak khuakhang laireltu bu hna nih Kawl ramkulh chungah a sifak bik state a simi Chin State cu chan he aa tlak in a thangchomi State ah aa thlen khawh nakding caah ramkulh cozah bawmhnak in Special Economic Zone (hi hnu cun SEZ) cu (SEZ) upadi ningin Chin National Front nih hruai dingin hnatlak a si. Cun cu Special Economic Zone hmalaknak ah Chin National Front le ramkulh cozah karlak ah rian hmalak nakding ceihmai`inak le hmalak`i dingin hnatlak a si.

8. Chinram kulh cozah i Chin State level remdaihnak khuakhang laireltu bu le Chin National Front i Chin State level remdaihnak khuakhang laireltu bu hna nih Chin State a thanchonak ding caah Chin National Front le Chin State cozah karlak ah pakhat le pakhat ruahnak i cheuhnak, riantuantinak, a herhning in i ceihmai`inak ngeih dingin hnatlak a si.

9. Chinram kulh cozah i Chin State level remdaihnak khuakhang laireltu bu le Chin National Front i Chin State level remdaihnak khuakhang laireltu bu hna nih Chinram chaklei ah cinmi bing, bing lei he aa pehtlaimi riantuannak le bing lehthalnak tbk., pawl a ci hmih nakding ca ah Chin National Front le Chin State cozah pakhat le pakhat i bawm in tuan dingin hnatlak a si.

Hi hnatlaknak (9) cu Chinram kulh cozah i Chin State level remdaihnak khuakhang laireltu bu le Chin National Front i Chin State Level remdaihnak khuakhang laireltu bu hna nih Kawl ramhun President U Thein Sein nih rian pek in sermi ramkulh level remdaihnak khuakhang laireltu bu hruaitu Railway Minister U Aung Min, ramkulh level remdaihnak khuakhang laireltu bu chungtel Environment and Forestry Minister U Win Htun, Chin State Chief Minister U Hung Ngai le Chin Peace and Tranquility Committee hmaika ah 6 January, 2012 ah kaphnih hnatlaknak in minsen thut a si.

By; Ro Lian (Phuntungtu Megazine)