JENTAIL MINU ZUMHNAK BANTUK

JENTAIL MINU ZUMHNAK BANTUK

                                                (Mathai 15:21-28)

By; Stalin Tha Cung Lian

Tutan i kan relmi kan tlangtarmi kha Kanaan minu i a zumhnak kong kha a si. Kanaan minu, Judah minu ti kan chim ahcun nang fiang ko lai. Judah mi a si lomi paoh cu Jental mi kan si dih hna.

Bawi Jesuh a chan lio i, Judah miphun hna an umnak, Judah ram le khua hrawnghrang i minung phung le biaknak an icawnpiak ning le an kalning kan zoh tikah kan hmuh khawhmi cu zeidah a si tiah cun miphun thleidannak tampi a rak um.

Cu miphun thleidannak ahcun a poi ngaimi cu, Judah miphun pawl nih hin Jental miphun hi zeihmanh ah an rak rel hna lo. Kannih cu Pathian miphun kan si. Pathian nih a thimmi miphun kan

si. Midang nakin kan sang deuh. Jental mi cu Pathian nih a philh mi hna an si. Pathian nih a thimmi miphun an si lo. Pathian nih a hngalhmi hna zong an si lo. Pathian fa zong an si lo. Cu caah Judah mi nihcun Jental miphun cu kanmah bantukin an si lo. Saram bantuk an si. Pathian theihpi lomi miphun an si. tbk in Jental mi kha biatak tein an nautat le zomhtaihnak le zeirellonak he Judah miphun hna thinlung ah a rak ngan tuk lio kha  si.

Cu caah Khrihfa mi nih kan iralrin awk ah a herh tukmi cu kha bantuk Judahmi thinlungput kan ngeih lo kha a biapi ngaingai. Khrihfa kan si tikah, Pathian dawtnak kan theih tikah, a chel caan ahcun kanmah nih kan theihmi a thei lomi kha zeihmanh kan rel hna lo. Khrihfa ciocio zongah hin Laimi hi kan zual rua ka ti. Cucu kan Laimi nunning a si. Pathian dawtnak kan theih tikah a thei lomi kawl miphun hna zeiah kan rel ti hna lo. Cu lawng cu si rih lo. Kan piangthar kan iti tikah a piangthar lomi kha zeihmanh ah kan rel hna lo… Va komh ding phun zongah kan ruat hna lo. Kha thinlungput zong kha kan ruah a hau ngaimi a si.

Zeica kan ti a si ahcun nanmah, kanmah zong hi i ruat hmanh usih. Pathian a thei lomi hna cungah zeitindah kan lungput awk a si i, a piangthar lomi, Zumhnak der deuhmi hna sinah zeidah kan rian a si ti hi bia ihal cio hna usih.  I uah ngam ding kan si lo. Judah miphun pawl an rak i uahmi kha Pathian duhmi a si maw? A rak si nemmam lo. Tuzaan caan kha bantuk Judah miphun ruahnak ah kan lak ahhin teh a um ve maw? A um kho men… I chek hna usih…

Tunai i kan relmi Bible chungah khan Judah miphun a si lomi, Jental (Kanaan) minu fanu khuavang nih a tuah i awlokchong tuk le lungrethei vansang au in a ummi nu kong kha a si… Cu minu nihcun Jesuh Khrih kha midamh khotu a si ti kha fiangte in a theih caah a thinlung dih umnak in Jesuh cu a panh. Cu a panhnak hmun cu Jesuh kha ^{caang 21} Tair le Sidon khua pawng ramlak i a kal lio caan kha a si. Cu lio ah Cuka ram i a ummi Kanaan minu pakhat kha a sin ah a ra i “^Caang22.. David fapa, ka zaangfah tuah. Ka fanu cu khuavang nih a tuah i awlokchong in a um ko” tiah fakpi in a au… ti kha caang ²² nak ah kan  hmuh khawh…

Hrilhfiah: Mah ka ahhin a fiangmi cu Kanaan minu nih Jesuh hi midamter khotu, tthawnnak a ngeimi a si ti kha a fiang. Cucaah mi damter khotu Jesuh kha bawmh a hal. Cu  a halnak ahcun a thinlung dihlak le a aw ngeihchun a thangbik in a au.. Ka aw (nawlnak) hi thei hrimhrim seh ti kha ai tinhmi a si ti cu kan hmuh khawh.

Kannih teh: Pathian sin i kan duhmi kan hal tikah Pathian nih thei hrimhrim seh, tiah kan lungthin dihlak in kan au maw? ti kha i ruah a hau.. A chel caan ahcun thla kan cam tikah kan huam lo buin tavuan a zah hna in kan cam tawn. A chel caan ahcun thla kan cam lio hna ah kan i hngilh. Cu bantuk bawmhhalnak cu Pathian nih a thei taktak lai maw? ti hi icheck a hau. Hika ah kan relmi Canaan minu cu a si lo, ka bawmhhalnak au-nak aw hi thei hrimhrim sehlaw, ka bawm seh tiin thangpi in a au…

Sihmanhsehlaw,  cu tluk thangin a au-mi cu  ^{caang 23} ahkhan… Jesuh nih bia kaa khat hmanh a let lo. Zeiruangah dah hi tluk thang in a au-mi a thinlung dih umnak in bawmh a halmi hi a leh hnga lo ti ruah awk a um ngai.  Cu lawng cu a si rih lo. A zultu nih an thawh i hi nu hi a kan zul lengmang, hna a kan hnawh, kalter ko” tiah an ti.  Afiangmi cu  hi Kanaan minu nih hin an kalnak paoh ah lungdong loin dawi peng hna sehlaw, a dawh. Cu ruangah hi ti an tinak hi a si lai dah ka ti. Cu tluk in hnahnok tiangin bawmh a halmi, thinlung dih umnak in bawmh a halmi nu cu

 ^{Caang 24} ahkhan Jesuh nih zeitindah a vun leh. Kei cu nanmah Jentalmi hna caah thlah ka si lo. Nanmah damtertu ah vawlei ah ka ra lo , “ Isreal mi lak i a tlaumi tuu hna sin lawng ah pei thlah ka si ko cu,” tiah a ti. A chim duhmi cu kan bawm kho lai lo. Nanmah bawmh dingin a rami ka si lo caah ti kha a si ko.. Hi ka zawn i Jesuh bia hi a fak tuk hringhran. A celh in celh awk a tha lo. Tuzan a rami zumtu nang le kei hi, Kanaan minu dirhmun ahhin dir ve usihlaw, zeidah kan lawh lai. I check cio hmanh uh!!!! Kanaan minu cu a lung a dong maw? Dong lo…

 Apeh rih ^{Caang 25} Jesuh hmai ah a  a ra i  khupbil in a kun i, “ Bawipa, ka bawm ko,” tiah a nolh than… Hi ka zawn ah hin Jesuh hi Mithalo bak hna a lo… Cu tluk in khupbil in zaangfah a nawl mi cu dawkaw, Jesuh nih a ti rihmi cu;

 ^{26 ahkhan}  “ Ngakchia rawl cu i lak riangmang i uico pek cu a hman lo,” tiah a ti rih… Jesuh nih a chim duhmi cu damtertu ka sinak, mi khamhtu ka sinak hi aw;…… nanmah Jental miphun (Kanaan miphun) pek ding a si lo. Isreal miphun pek ding lawng a si. Cucaah nanmah Kanaan miphun kan damter hna hi a phung a si lo. ti kha a chim duhmi a si.

 Hi ka zawn i Jesuh bia hi ruat hmanh uh,, Pathian fapa a simi, vulei mi hna khamh awk ah dawtnak le zawnruahnak he a rami pa nih zeiruangah dah hi minu cungah zawnruahnak a ngeih hnga lo, a lung a tthawn tuk hnga ti hi biahal awk tampi a um. Nang na dirhmun icheck tuah.. Asinain, Cu kanaan minu cu a lung a dong maw?  Adong hlei rih lo..  Anolh than rih.

Caang ^27. Minu nihcun a nolh thanmi cu, “ cucu a si taktak ko, Bawipa; sihmanhsehlaw, bawi cabuai cung in a tlami rawl tiltlawt cu uico nih an ei ve tawn ko hen pei,” tiah a leh. Hika zawn ah minu nih a chim duhmi cu : “a hman ko Bawipa, a tu i kan halmi damnak hi Isreal miphun ca i na chiahmi rawl a thawtnak kha kan hal lo ee.. Isreal miphun nih an ei ciami  a tiltlawt tangmi, cabuai cung i a tla mi te khi kan halmi a si ko eee… Cu a tiltlawhte zong cu na ka sianh lai lo maw? Bawipa!!! Ka bawm ko sawh law….. tiah a nolh than…

Hika zawn ahhin Jesuh nih minu nih a zumhnak a tthawnning, Jesuh damter khotu a sinak a fianning, aa bochan nih a hmuh tikah hin a celh ve ruam lai lo dah ka ti… A zaang a fak tuk ve lai…. Cu tikah a thawhmi cu, ^28“ nangmah cu zumhnak thawng ngaingai a ngeimi na si. Na duhmi cu kan tuahpiak ko lai,” tiah a ti. Cu caan hrimhrim ahcun a fanu cu a rak dam… A men….

Biafunnak: Tuzan caan zeiruangah dah Dawtnak in a khatmi Pathian fapa Jesuh Khrih nih hin hi Jental minu hi, hi tluk fak hin a ti hnga. A dawt lo ruangah a si hnga maw? ti zoh tik a si lo. A zaangfah lo ruang zong ah a si fawn lo….. amah nih a thimmi Isreal miphun le nihin zumtu nang le kei kan zumhnak tthawnter a kan duh caah a si. Cucaah nifatin kan khuasaknak siseh, fimnak kan kawlnak ah siseh, Pathian sinah thla kan cam len ko zongah Pathian nih fawizang le rianrang in a kan leh lo caan tampi a um ko lai. Tuzan hi mino zaan a si caah mino lei deuh in van chim ahcun; Kan mino hna Bible cacawng tampi nan um. A cheu cu ca nan cawnnak ah lungrethei le harsa ngai in a ummi tampi nan um ti kan theih tik ah kan lung a tha lo ngai tawn.  Zeiruang ah a mah Pathian bia a cawng cuahmah mi hna hi lungrethei tuk in le harsa tukin a chiah hna hnga? ti zong biahal awk a um.  A chel caan ahcun nan lung a dongh caan tampi a um lai i a tah zong nan ttah caan a um ko lai. Zeicatiah Sianginn kai lio i harsat cu a fawi lo. Kei zong hi Sianginn kainak dingah Pathian sin ah thla ka camnak hi kum 13 a tling cang. Tutiang ah ka kai kho maw? Kai kho lo.. Khuachel ahcun  lungkuai in ka ttah caan a tampi. Zeimaw caan le bang ahcun ka hal ti lai lo ti ka ruah caan a tam tuk. Ziah ka biakmi ka Pathian hi zeizong vialte a tuah khotu a si ne lo maw? A si loah hi tluk in ka au-nak aw hi a ka lehpiak duh lo. Thluachuah pektlak ka si ve lo maw? ti in bia keimah le keimah kaa hal caan a tampi ve. Ka hawikom, ka sianginn kaitti thing pawl cu a tu ahcun an i fit tuk cang. Ka nakin cathiam deuh an si maw? A cheu cu an si hlei lo. Khuachel khua ka ruah ahcun a thin hi a khenh in a ka khenh tawn. Asinain, ka lung a dong khawh lonak cu tuzaan i kan i ruahmi Jental nu tuanbia ruangah hin a si. Ni nikhat cu ka duhmi a theitu Pathian, zeizong vialte a tuah khotu nih a ka leh caan a um te ko lai ti hi ka thazaang laknak a si. Nan nih zong nan lung maw dong lai uci.. Jental minu bantukin au chih ko rih uh.. Pathian nih na aunak le ka aunak aw hi a theih ko… Kan zumhnak hi tthawnter le harter a kan duh i cu lawng si loin kanmah hmangin midang zumhnak harter zong kha a duh chih. A caan a za a ti tikah a kan lehte ko lai. Kan biakmi Pathian hi zungzal a nungmi Pathian, zeizong vialte a tuah khotu a si ko.

Cu bantukin thiamthiam in nifatin khua kan saknak zong ah a si thiamthiam. Delhi ah ramthumnak kal a hngakmi kan si i ramthumnak kalnak ding caah thla kan cam cio. Kan um kum zat in thla kan cam cio. A cheu cu amah Pathian lei zongah a ttang lem lomi zong an len hoi. Ziah hi tluk in  kan hal cio mi a kan leh ne lo… Micheu le bang cu Delhi kan umnak ah zawtfahnak le harsatnak fak tuk nih a kan tlunh i lungrethei vansang au in (jental minu) bantuk in a ummi kan tampi. Kanmah lawng lungretheih le vansang au cu chim hlah, a kan hruaitu kan upa pawl lungrethei tiangin dirhmun chia i a ummi tampi kan um. Ziah cu tluk in vansang au in a ummi Pathian sinah bawmh a hal pengmi thla a campeng ve ko mi zei ruangah dah Pathian nih a kan leh hnga lo ti in lungdong in na um caan a um lai.

Cu caan zongah cun Jental minu (Kanaan minu) bantukin lungdong loin kan hal peng ahcun kan halmi a ngeitu Pathian nih a ka leh hrimhrim ko lai. Lungdong loin Bawipa chon peng ko hna usih… Kan nih Chin miphun cu a si a fakmi, fimthiamnak a ngei lomi, a derthawmmi kan si. Pathian bochan loin khua a sa ngam ding kan si lo… Lungdong loin Bawipa sinah ihngat ko hna usih….. Bawipa nih a tha a rem a ti ahcun thluachuahnak kan pekpiak ko seh…. A men..