A RALAI MI KHUATU KHA KAN CUAN

A RALAI MI KHUATU KHA KAN CUAN

Bible Caangthim

: IThesalon 4:13-18

                  :Biathlam 14:12

               :Hebrew 13:14

Vawleicung ahhin biaknak hi a phunphun in kan um cio hna. Cu biaknak hna i an Bible zoh tikah an ttha tuk cio ko hna. Asinain, thih hnu nunnak kong an um hna lo. Asinain, kannih Khrihfami kan van a tthatnak cu kan chuahkehnak in kan takpum a thih hnu pin lei zungzal nunnak kong tiang tlamtling tein aa ttial dih cikcek. Cucu kan van a tthatnak a si.

Cun kan Bible chung kan zoh tikah Isreal miphun hi ttah a hmangmi miphun an si. An nu, an pa, an u, an nau, an fa, an pi le an pu an thih tikah thi dengmang in fak tukin tah a hmangmi miphun an si. Kannih Chin miphun zong hi ttah a hmangmi miphun kan si ve. Isreal he hin kan nunphung kan zoh tikah kan ilo ngai. Chuahkehnak lei hlathlaitu pawl nihcun vawleicung ah Isreal lawng hi an sam a kuami miphun an si an ti. Asinain, Chinlung People Cultural pawl nih Research an tuah tikah Chin miphun kan sam hi a kua ve an ti. Cucaah Isreal hrinthlak kan si tiah zumhnak an ngeihnak a si.

Asinain, cu kong cu kan chim duhmi a si lo. Ttah hi Bible nih a kan thlauhnak kan hmu lo. Ttah ding a si ko. Ka u, ka nau, ka nu, ka pa, ka pi le ka pu an thih tikah ttap lo piin nuam ngai in Ni huar ning law, mi nih mihrut nan ka ti men ko lai. Kan ttah awk a si ko. Isreal mi zong kha an rak ttap ve ko. Asinain, an ttah ning kha mithiang Paul nih a zoh lengmang hna tikah… Aaaaaa!!!!.. hihi cu a hman ti lo. An ttah ning hi an luan cang ti kha  a hmuh tikah hi ca hi a kuat hna. “ U le nau hna ruahchannak a ngei lomi bantukin pei nan tah cu!!... hi tin nan ttah awk a si ttung lo. Kannih cu thih hnu pin lei ah zungzal nunnak aa ruahchanmi le zungzal nunnak ah khua a sa dingmi  kan si. Jesuh cu a thi i a thotthan ti kha nan hngalh ko ttung. Kannih zong kan thi lai i kan thotthan lai i, zungzal nunnak vanram nuam ah kan um tti hna lai tiah ca a kuat hna nak a si. Cucaah hi bia hin nan tha inuamter ko uh……

Biathla 14:12 ahcun Pathian mi hna, Pathian nawl a ngai i, Jesuh cungah zumh awktlak in khua a sami hna nihcun, hi zawn ahhin, intuarkhawhnak an ngeih awk a si ti kan hmuh. Cucaah, kannnih zumtu Khrihfa mi hna nihcun ngaihchiatnak kan ton tikah intuarkhawhnak kan ngeih a herh..

David Siangpahrang pa zong kha Uriah nupi sin i, a ngeihmi a fa kha a zaw ciammam i a thi deng cang. Thlopbultu hna nih an thlop kho ti lo. Cu tikah David cu a aw-lok a chong, umtu zia a thiam lo, inncung le inn tang a hlat, a si a vang, midang nih chonh ngam loin a um. A kuttang pawl nih an ruahmi cu kan siangpahrang pa hi a fapa hi a thi taktak te ttung lai i zeitindah a um te lai ti lawng an ruat. Asinain, a fa cu a van thi taktak i, David Siangpahrang pa cu “ na fa a thi cang e” ti chimh kha an ttih tuk hringhren.  A ruang cu a thih lai hrawng a umtuning an hmuh tikah an mawh ve hrim lo. Asinain, cu tin a si lo. David a thi cang maw? Tiah a hal hna. Aw!.... A thi cang tiah, an leh. A thutnak hmun in a tho duak i, inn cungah a kai, a tak ai kholh, angki ttha le bawngpi ttha ai hruk i rawl le mitsur hang ka pe u law ding ning tiah a rianttuantu pawl cu a ti hna.

Cucaah a kuttang pawl cu an khuaruah a har tuk i hi ti hin bia an hal..Siangpahrang pa ziah na fapa a zawt lio ah mah tluk khan na ngaih a chiat i a tu vial ah lunglawm mithmai panhte in na um tiah an hal. A lehmi hna cu…ka fapa hi keimah sinah a rak kir ti lai lo.. Cuaah ka ttah ding a si lo.. Keimah tu amah sinah ka kal te lai… Zeitluk hmanh in va ngaihchia ning law san a tlai ti lo” tiah a leh hna… David tuanbia kan zoh tikah a fa a kalnak ding kha fiangte in a hmuh khawh, Cu hmun ah cun zungzal in ka fa he kan lengtti lai ti kha za ah za in zumhnak a ngei. Tuchun zumtu hna kan u, kan nau, kan nu le kan pa an kalnak zungzal hmun nuam ah lungawttawmnak um lo tein kan kal ve lai ti a fiangmi khrihfa zumtu kan caah thi deng in ttah kha kan rian a si ti lo.

Hebrew 13:14 ahcun “ Hi vawlei ahhin kannih caah zungzal hmun ding khua a um lo, a ra laimi khua tu kha kan cuan” tiah kan hmuh. Cucaah hi vawlei ahhin a hmun ding kan si lo. A ra laimi khua tu kha kan cuan. Careltu le cattialtu kannih zong zungzal a hmun ding kan si lo. Hi vawlei ah zeihmanh a hmunmi thil an um lo. Cucaah, kannih Khrih a zummi hna nihcun zungzal ram nuam ah kan kal ve te lai ti ruat in a ralaimi khua tu kha cuan ko hna usih…

By; Stalin Tha Cung Lian