DIARY

 Writer by; LS Mang            

Sunghno ka nu le ka semnak lungrawn khuazung ngai in tluang thuk ah khua caan ka relnak caan sau rangmang kaw mising he nun hi ka nun taktak ah kai ruah hrulhhrulh caan hi a tlawm ti lo. Miphun dang le ram dang ah ralzam dirhmun in khuasa hmanh sih chuahsemnak khua le ram thanchonak ding caah kan si khawh ning le kan khap tawk cio in rian tuan le cawlcangh cio. Kan khua le kan ram in kan chuah hnu ko ah hin kan caah kan khua le kan ram an sunlawi ning kha kan fiang chin lengmang. Cu hlan ah khua dawt le dawt lo a ruah awk a hngal lo hmanh nih khua le ram caah ti lungput kan hong nei cio a si. Upa bia ah “Mi har ah daar al” an ti kha kei zong khua upa hna nih khua tuanbia khawmsua ding in rian an ka thiah caah nihin hi Janakpuri C1in taxi kai laak i sunghno ka nu le kan ruun, kan semnak lungrawn hmuh lai hngahhlang in thatho ngai in kai thawh. Delhi in kan khua tiang hi zarhpi zarh khat ka rau.

Kan vawleipi a than ve bang kan Lai khuate lei zong than lei a rak panh ve ciahmah. Nihin ahcun thiltom I phurh in khual tlawn um ti hlah kaw kei zong motor cycle (125) in Tio in an rak ka don. Rang lam a si tawnmi kha atu cu hawi ram dang he cun i lo lo hmanh sehlaw motor keneh a tla ve cang. Tu hi fur tlakka a si na ko in motor nih lam cu amah ta bik ah ai ruah rua, tilu zirhnak kahcham bang kuar dul a lamh. Kahchan tlang zawh cun cycle cun an kan phurh/phirh. Cycle mongh an thiam ning cu ka khuaruah an har ko. Tiau kan phak cu ka thinlung cu phun dang pi khin a um. Minung ngai hi mah le ram te ah kan thla a rak tla bik ko rua. India khuahlipi le ram leluai nak in Tiau kuang ah ka tha a dam deuh ving ve hi. Tiau in tlawmpal van kai ah khin, ram le miphun caah hriamhrei tlaih in ram haaktu Chin Ralkap hna hmuh ko ah kan ram hi kanmah ta a si ti a fiang khun. Lung a hmui khun i upat hmaizah ka pek hna.

Zaang dam ngaingai in thing phur tlun cu ah inn kan phan. Rian tlai lo khuami khuahngal le innpa chatthlang he tiin zanriah chumh cu tiang kan ituai hna. Zanlei sangah ka rian herh pah he, kan khua a vawlei hrimhrim zong cu ka ngai lo maw hoi pah lang tiin khuabawipa va len kai thawh. Zanlei nitla cuar van kam sen khuadawm var circer tete hna, khoi maw zawn tiva kuang ninu nih a lian taak cang hna i a hliapmi hna zoh ah zoh cim lo an si. Furpi ni khua that ko hi dah ai dawh khun rua ti-awk khin a um. Hi tluk ram dawh, fing le tlang hring dildel le mei thang hna lak ah zingthli thiang nih a van hranhmi vate zaihla sak thawng hna hi hodah hoi lo le thlir lo in a um siang hnga! Maw Laitlang keimah caah na tha hringhren ko maw kan khua.

Khuabawipa inn ka phanh hlan ah hin kan khua hmun lai lam tte kip tonnak ah dawr pakhat a um. Dimdim dawr a si. Dawr ka va phak ah Dimdim, a pa le khuahngal cheukhat nih ka kut an ka tlaih le thawng an ka hal lio ah khin ruah lo pi in ka mit sir tein ngaknu tungtai rem muidawh samthlai rem taktakmi ka van hmuh. Oi khat ka zoh. Ka zoh nolh. Mising cuti rumro zoh zong cu kai phurung pah. Sau a um lo. A hawi he an chuak colh, thil an rak caw ta rua. Mizei ti cu chim lo a min ho ti hmanh ka hngalh lomi nih ka lung a cawlter rua. Thawngpang haltu zawndamh in an bia ka leh pah ko rua hna tu kha. Inn chung lei nih ka mit le ka thinlung a hui tuk deuh. Khuabawipa sin in biatha le thazaang peknak bia ka theih cu ka hna a ngam hringhren. Zaangthawng seino hna kan thawnnak taktak cu kan pale hna dirkamhnak hi a rak si. Khual tlun zan e ti loin mino upa rual he ton biaruahnak kan nei. “Khua le ram caah kan ti khawh tawk cio kan ibawm hna lai” tiin kan bia kan fun cu kai lunghmui hringhren.

Ka nu nih arrti a ka em piak i it colh ko na cei tuk lai a ti caah ihnak ah ka lan colh. Nain kai hngilh ruam loh. Khual tlung ka ceicer hngilh khawh lo si dawh ka si loh. Zan lei ka thil hmuh nih a ka tuai. A min ho si hnga? Nutung hna a si sual hnga maw?! Nutung cu a si bal la loh. Hamtu hna teh a nei hnga maw?! A nei fawn la loh…….ka thinlung a buai ko. Ka thinlung nih a chiatnak lei a hmu kho loh, a ruah hrim a ruat duh loh. Cu lio ah ka thluak nih cun ka thinlung cu a al ve. Ka thinlung le ka thluak a buaitertu lengdawh ruangah tim arr an khuan tiang hngilh zai ka rel rih loh. Thaizing khuadei nih lairel teseh tiin ka thinlung le ka ruahnak bia chahnak an tuah hnu ceo ah khin zaan dai sin ah hngilh zai ka rel.

Nihin cu ka rian tuan ding in kai thawh. Kan khua ah hin computer cu ter khat te hmanh um hlah kaw khua tuanbia ca herh vialte cu kut in tial le roca vialte cu a tlen in tlen a hau. Khuahngal ka hawile 2 le Dimdim nih kan in bawmh ko lai an ka ti caah ka hna a ngam ngai. Cawlcanghnak rem deuhnak ah tiah Dimdim te inn ah ca cu tleng ding in ka phan. Maw Khuazing! Nizan hngilh kho loin a ka tuahtu Lasi lengdawh cu a rak thu ko. Dimdim nih a ka pekmi thutdan ah ka thu. Lasi ngaknu cu ka zoh ko. Ka chawn hnga maw midang sin in dah a konglam ka dotthlat hmaisa hnga ti kong ka ruat manh ti loh.

Hi!

Hi!

Aa….kan khua ah kan hmuh balmi na si lo e? Na umnak a sau maw? Na rak tlawng ta maw?

Mmm…..ka tale an um i ka rak tlawng ta hna.

Thawngaa ka si. Ka kut ka chanh.

Cuaite ka si. Nang zong hi nan khua ka um chung ah kan hmu bal ve loh. Heheee....

A kut a ka chanh ve i kan kut kan i tlai.

A mit dum ziziai tein a mit tial that le a mit au pian ko cu thil ti a si loh. A mitau ah a thinlung cu hnawmpel kop hlah sehlaw ka dawh ter. A ha tian rem le vaar that cu an chim siangpahrang Solomon lung mawntu Sunam leng no nih a ian lai ka zum loh. A tungtai thlirthler tele a liang lonh fang in a saumi a sam tlep zitzet tiang in Khuazing sin raithawinak caah dotla tilim nakzik bang soi awk a um hrim loh. Ka konglam cu a tawinak in ka hei chimh.

Cuaite na caam sau la maw?

Mmmm….Ka fiang rih loh. Zarh hnih hrawng cu ka caam ko rih men lai.

Saupi in kan cam pi ko ka van ti vial ah Sui2 le Sung2 cu rian bawm ding ah an rak phan ve.

Aaa…. Cuaite nai manh ahcun kan rian kan bawm ve law ka duh ko.

Aww…manh cu kai manh ko. Nain ka kuttial hi a chia ngai le.

Kan rel nolh khawh paoh ahcun cucu dahkaw tial hnawh chan cu a si ko cuh ka hei ti. Kan ca tlen ding cu tam pah kaw thlachiat a ruat i a kan bawmh. Kan ca cu nutling pali le kei nih nithum khengte kan tleng.

Mi tlangvalte khua i zarhpi zarh khat ka cam chungah ka rian he ai pehtlai loin zan hnih koko dinh/len caan ka nei. Cu zan hnih laklawh cu nungak maw ka len la, hawikom he biasawng tlorh zong cu ngaih a um fawn. Zei khom zei sehlaw Lasi ngaknu a ruun sang oi khat tel kai lo cun ka nun a tlin hnga maw. Leng dawh ruun sang kai lai, kei lung ngamnak ah velhle aan tha tong ai ci kaw roriak bia ah kan chiah lai ti phun khi ka lungah kai sak pah i ka choi. (A aw ka hal lai ucih).

Ka kutka kingh le nan um maw? ti cu ai rual colh.

“Kan um e” kan leng tile inn ka hun ai rual.

Ee, nangmah maw! kan leng kan leng. Ka hin rak thu hih a ti i thutdenh a ka pekmi ahcun ka thu. A u nih bia tlawmpal a ka ruah. “Khah kei hngakchia pawl vehvat an hau. Nanmah lawng rak i leng kun u” tiin a kan chuah tak. A u hi siangcachim a si. Kan mah pahnih cu an inn king ahcun kan thu. Ka thinlung nih ‘vawleicung ral vialte doti le muihnak horkuang thuk chungah lut ti in, tlang cung chokhlei senri, ai-nawn le dingding hna an paarnak rimhmui nih a zelhnak hmun ah kal ti ding in sawm’ a ka fial. Ka thinlung ve nih cun, ‘vawlei ralpi a doti ding le thihnak thladem hmanh palpi ding ah saksiam pangpar kai tonh ngam hnga maw?’ in ti sehlaw zeitindah na tuah lai? Vawlei ralpi an teipitu dingle na lawmhkhanghthawinak rawl an serpiaktu ding hriamnam cu na zah awk a si!’ a ka ti ve. Ka thinlung maw ka zulh lai ka thluak deuh ti kongah mifanau ka buai hringhren, keimah tawk ah. Tak le ngai ahcun ka thinlung nih cun zarh khat ka caam chung ah hin zaantin, rian dih hnu ah len zong a ka fial lengmang cang. Rian kan tuan lio ah siseh, chuak lo bak in amah zoh a ka fial cang. Cucu thil tha bik cu an si loh. Ka thluak tu zul ko rih kun lang, tiin ka lawi.

Khual lam hla in a ra ai ti an si rua, sa vo lian an ka voh. Zarhpi zan ah phungchim an ka thiah. Phungchim thutnak ah ka thut caah mipi ka hmu tuk hna loh. Phungchim ding in pumhruaitu nih a van ka sawm. Ka hongdir. Baibal ka van rel. Mipi lei ah ka mit ka van chiah cuuu….Lasi he kan mit ai tong! Pasal ka bia ka pial ko. Mithla hmu ko kai lawhter. Midang nih an ka theih sual lai le ka bia pial rumro i pial lai ka phan tuk ah thla ka cam manh rua ka ti! Hehee.

Nihin hi cawn nikhat ni a si. Ka rian he pehtlai in Thantlang le Hakha ah lanh ka hauh caah kai thawh. Thantlang phone ka chawnh cia hna, ka phak zan ah tonnak nei kho ding in. Rian a ka bawmtu ka hawile thil phurh ding in ka kamh hna. Thantlang ka phan. Kan bia bang meeting kan nei i kan rian zong kan lim. Thantlang in Hakha ka chawnh than hna, ka phak zan ah meeting nei kho ding in. Ka phak zan meeting kan nei. Kan meeting a dih kho loh. Zan khat riah ka hau. Ka phak zan he cun zan hnih a si cang cu mu! Thaizing cu zei a si hmanh ah tlun ka hau cang. Ka hawipa (khua ummi) thaizing Thantlang ah rak ka la ding in ka chawnh.

Hakha kan khua upa khuahngal nih zan khat cu kan caampi ko hme an ti nain, thei til vawlei ah a tlak bang kei ka umnak ding cu kai fiang. Thantlang lei kalnak bus hngahnak tiang khua upa cheukhat nih an ka thlah. Ka suimilam ka rak zoh leklek ko rua! Pu Hup nih “kan nih lei cu hihi kan si ko. Caan hi kan upat lo tuk le a caan kan khiah ning hi kan tlolh lengmang. Bus zong hi suimilam a cheu cu a rau peng” a ka ti. A bia dongh khap ah bus cu lei ngualmal in kan hmai ah a hong dir. ‘Dam tein’ tiin kan i thlah hna. Hakha zinglei khuati, kan lam le kan sul ngingiai tete le kan fiangtlang hna cu zoh cim loin. Lasi lengnu lei panh in ka chunmang he kan i kom.

Thingphur tlun cu ah Thantlang kan phan. Ka hawipa zong kan khua in a rak phan cang. Hakha kan bia khiah le khuakhan vialte thlanglei sang Pu Khup sin ah va pek ka hau. Ka hawipa he Pu Khup inn lei panh in kan kal. Lam kawi kawi khat kan liam ah khin ka lung vialte a cawttertu, chun cingling ah muihnak a ka phurhtu  thil ka hmuh. Cucu zeidang si loin Lasi lengdawh Cuaite he kan itong. Zeibang bia le banhla ko thla si! Zeithil ko dah cang! Ka ar. Ka mawh lo pi! tha tein “tu thla chung cu ka um ko rih lai” a ka ti si. Vanmi he ka tahchunhmi nih hin a ka hlen maw? Mi hlen hmang, rultur a keng ding a si hnga maw? Cu kong cu a ruah hmanh ka duh loh. Cu bantuk minung cu a si kho lo hrimhrim. Cu bantuk a si ding nak cun kan vawlei nih ai mer ning khel a thlen a fawi deuh ving la.

Hi! ka hin zeidah na tuah?! Hehee (Ka nih a hel)

Hi! nanmah maw! chungkhar herh ah ka nu nih a rak ka cah i ruah loin ka rak tlung cu hi. Nan riak ko lai lo maw tuzan tel cu?

Cuaite, tu hi Pu Khup te inn ah kal kan i tim. Rian kan lim in khua khen in kan lan colh tela. Thil kan phurh le Parku te inn ah hei I hlam pah te ko kun. Kan nih zei can kan rauh lai kan i hngal tung lo hih. Aw tak in! aaa……ka  e-mail id ah Thawngaa7@gmail.com. FB Lalluai Thawngthawng.

Kei Parhleicuai@gmail.com. Fb Milky Cuaite. Cun ka ph No. 9460404463. Aaah….Uthawng ma cu nangmah a phurhtu um loin mi inn ah thil cu ka la ngam hnga maw?

Nangmah ta si. Nangmah kan phurhmi a si. Uthawng nih thil a ka phurhmi ka rak la va ti hna law an in pek ko lai. ‘Vawlei ah nangmah lawng nih kha thil kha tonghnak nawl na nei. Hakha a ummi lak ah a thaw cemmi dah kaw khuatung cut in ka hawl hnu ah kan phurhmi a si’ ti ka duh nain ka peh loh. Pu Khup te inn ah kan lan.

Kan rian kan lim in ka tlun inn ah kan thil timh ah kan kai. Ka hawipa a thil herh a zal ve. Inn ka phak khap ti awk ah Cuaite le a hawinu an rak ra. Thutnak ka sersiam piak hna ning nih a hawinu a mitau a phinter pah. Zeitin tiah upat-hmaizahnak le tuammuai hi chaw le va in tuanh luaimai lawng in a rak lang lem rua loh, thutden pek te zongah a lang ngai ko rua.

Hihi kan phurhmi si.

A hau lo nain awww….nain kai lawm tuk Uthawng.

Tikor hmawm dai ah ka hawipa a rak phan. “Kei kai manh hih. Nai manh tik ah tlun khawh si ko” a ka ti.

Khua lei lan ding hna nan si tung le sau len thiam zong nan si loh. Nan nih luci (upa tinak) pawl hi cu. Kan nih kan lawi ve ne la. Dam tein va kal te ko kun uh tile Cuaite a thawh ai rual. Aaa si, tlung ding cu kan si. Nain khoi tlawmpal tel cu kan thlah hna la cu nan sian ahcun tipah in inn leng kan chuak. Dr. Humh Thang si-inn lei in Sayakyi Tha Nawn inn hmai tiang ka thlah hna. Hi caan tawite chung hi Thantlang le Hakha zanthum ka caam chung ah hin kai lawmh cem caan a si. Khah, ka tiang in thlah hna ning. Dam tein hong um ne uh tiin ka kaa nih cun a chim nain ka thinlung bel nih cun maw ka vanmi nang lo nilen ka zuam hrim lo caan nih tlaih awk that tung lo, dam in tawn than caan Zingnu sin nawl lang sing ee tiin a uai.

Kan thil tete cu kan itim i khua lei panh in ka hawipa he kan ithawh. Ka lung a awi kho hrim loh. Sal tang ding in hruai khi bang, lungrawn khua panh cu ka thinlung nih cun a ngaihlah hringhren. Sunghno ka nu le lungrawn khuate ka theithiam hram uh. Nanmah kan ngaih hna lo a si hngin lo. Ka thinlung hmu u law ‘na mawh lo’ nan ka ti ko hnga dah kaw. Kal lei i ruahchannak he ka rak zulhmi lam kha atu cu pawl king lam he maw ka cuai chun hnga? an chim luruhtlang kalnak lam tah hi tluk hin a king hnga maw? Ka tanmi fingtlang an i dawhnak anmah kel an si nain ka caah nunnak nei lo hnawm khur chung pangpar tluk hmanh an si ti lo. “Cho tial lo nih tha ka la, ka co lo nih zaang ka zuun” an ti tawn maw kha? Thlaler  thal mangkha ah tilim hnuk tlai a fa loin hruai hna sehlaw kei nak in a uai hlei hnga lo dah kaw. Lasi lengdawh ka caah na sung tuk mu.

Tluang tein khua kan phan. Khuahngal thawng hal nih an ka zelh nain, ka thlavai a kiang. Lungrawn a iang a cuai ruangmang ka caah, Cuaite tel lo cun. Tintling ah ka me a rem kho hrim loh. Zaan dai le zantim khauzik zai remh le khuangbai khuangcawi nih an ka thlim kho ti loh. Kai tengtale, cuticun khua ka dei.

Nihin cu ka lung a leng ko. Cuaite phone ka chawnh. A aw theih cu Himalaya tlangpar ah puanlum pek tluk a si ka caah. Ka thinlung a lum than. Ka thinlung ka thup kho hrim ti loh. A cungah ka thinlung, ka duhdawtnak kong ka phuan.

Lungrawn ah um lan ding ka si thiam lo caah Pastor le ka nu le ka pa nih thla an ka cam piak hnu ah hauka tiang an ka thlah. Cuticun Delhi panh in khua dawh kan lungrawn le sian lo kan ram te cu ka chuahtak than.

Kan khua in Delhi hi zarhpi zarh khat ka rau. Ka lam thluan ah Cuaite he ka thinlung in kan ikom. Dam tein Delhi ka phan. Ka kal hnawhchan khua tuanbia tuah ah thla khat deng ka buai. A cu lak ah ka paw ca rian tuan a si rih. Zing arrkhuang in zaan sml 7 tiang manh mui ka hmu loh, zarhpini dah ti lo ahcun. Cu lak ah Cuaite online ah a thu hnga maw ti zoh, bih cu ka thlolh loh. Uico sabel bul maw ka lawh deuh hnga vate rap bulmi hngakchiapa dek?! Online in kan iton caan ah ka si khawh chung in awka thlum in chawnh-biak le a lung ton kai zuam zungzal. I lunghmuih ding biapipa pipi kan i ruah lo hmanh ah ka nun a lawmhtertu a si zungzal.

Tuahsernak aitel lomi zumhnak cu zumhnak thi ti a si i a si awkte a si. Dawtnak le zumhnak hi ai chuanchangmi an si. Cucaah a si lai, ka Lasi caah zeizong tuah piak ka duh hi. Delhi in Hakha lei ah a tlung dingmi ka theihhngalh a um. Ka lungah Cuaite a cuang colh. Cuaite thil ka kuat. Hi ka thil kuat hi zeipipa si hlah hmanh seh ka thinlung a cungah a hmun ko ti langhtertu tel ah cang hram sawh seh.

Kumpi kum hnih Delhi i khua ka sak nolh hnu ah, kum tampi ai hmu ti lomi ka hawile hna he X’mas le kumthar hmang ti ding in kan itim hna lungrawn ah. Lungrawn ka ngaih le Lai ram ka ngaih, cun ka hawile ka ngaihnak hna, ka chungkhar ka ngaihnak zong teh! cu vialte fonh hi Cuaite ka ngaihnak he cun cuai chun awk a tlak rua hnga loh. A ka cawmkengtu kan ram le ka thanlianhnak ka khua nak in Lasi ngaknu ka ngaih deuh hi ka mawh maw mawh lo dik. Tuak uh, ruun khat semcawi hmanh nih ton than lai an hngahhlang an ti si!

Nihin cu Delhi in khua kan phan. Kom hawi thing hna he van iton cu a nuam hrim. Bia zaza kan iruah hna. Upa ti nacha le kan hngakchiat lio hna kan ngai thulh. Tu kum X’mas le kumthar cu a nuam hrim ko an ti cio. Kan ram riahnak kong le kan ngasi lak kong, kan changkham kong cu hnu ah kan ruah tela mu. Hi tluk hin nuam kan tawl nain, ka thin a thi hrim loh, Lasi lengdawh kan lungrawn ah a leng ti loh.

Tu zing cu Hakha kal kan ithawh ram dang in a rak tlungmi ka hawipa he. Hakha kan phak bak ah Cuaite phone ka call. A phone a lut kho loh. Oi thum khengte ka call. Hakha ah ni hnih ka caam. Hi chungah ni khat hmanh phone call ka philh loh. Ka lung a dong loh. Ka tlung lai oi hnihnak ka call zongah a lut hlei loh. A lut lomi ph call lengmang zong cu ka ti nain ka call thotho. A oi thumnak ka call ah a ring vuaimai! A ring tak ko maw ti phun khin ka phone cu ka van zoh ta.

Hello…Cuaite ka si.

Hello…Cuaite Thawngthawng ka si. Na dam tawn maw?

UThawng nangmah maw?! Ka dam ka dam. Khoika in dah na ka call tu hi? Na dam ko lo maw?

Na dam paoh ahcun ka dam ko hih kei cu. Heee… Hakha in si. Tihni kha ka phan. Hakha ah a um an in ti nain kan itong ruam loh. Na ph kan call len nain tu ceo a lut.

Aw….. si ngai. Ka rak kir manh cang cu teh. Nan khua hna ah kan va kal le cu ruang si lai. Nan khua in nizan bak kan phan ve. Cun tu hi kan khua ah kal kan itim. Zanlei ah rak kir manh kan duh.

Aaa…. si ngai. Na buaibai ngai si mu.

Hehee si hrim hi.

Vei dahkaw X’mas laksawng kan phurh le dawkaw cucu zeitindah kan pek khawh ning si hnga, nan inn ah maw ka rak chiah ne hnga?

Aaaa!!! UThawng cu awww…a herh lomi hi aww. Nain na ka phurhmi cu kai lawm tuk.

Laksawng dawkaw a si ko cuh. Apipa dom ah maw ruat lai ci liai! Heheee. Si cun khua hna ah kan itong kho te theo la cu.

Awaw sisi. UThawng kai lawm tuk.

Khah si nele nai manh lo he chun tha chung mu.

Awaw si, na ka chawnh le kai lawm tuk. Nang zong chun tha tuk.

Thantlang kan phan. Ka hawipa he a pu (ka hawipa pu) kan leng. Lawi pah ah Cuaite len ah kan lan. Maw Khuazing! Amah telawng a rak um. Hi caan tha hi tlolh ka tim ti loh. Zei ton zong va tong ning, hi tluk ka nun a pentu, ka chunmang in ka zanmang tiang a khatmi hi ka caah ka zeizong a si kong hmaitonh tein chimh ding in ka thinlung le ka thluak ka timhtuah.

Tikor hmawmdai kan thut manh deuh hlan, ka hawipa nih caan peek a kan timh dungdang ah a hawile an hong chuak ko! Aizelaww…..!!! ka van cim! Hihi Khuazing khuakhan a si lai ka zum kho hrim loh. A si cem hmanh ah Khuahrum khuakhan a si la ka ti. Zeitintiah Khuazing nih cun idawt cu a kan duh piak si. Ka hmai a dul. A hawile lawi zau an itim loh. Cu hna lak ah hmurka tha zong kan ting kho loh. Ka tithiang Buluk pawl nih an nawih ne. Lawi tuan hauh dawh in kan um ti ka ruah lengmang lio ah ka hawipa nih “lawi pah sih hme” a ti le kan lawi.

Minung hi kan hmurka lawng hi bia an rak si loh. Kan cawlcangh le kan hoiher, kan mitau le khuahrah hna cu hmur le ka nak in bia thuk deuh an chim zungzal. Cucu mi tampi chimmi bia le bia dik a si. Cuaite an inn kal nolh ding cu a hmai ka khap set ti loh. Online ah bia pipa a ka ruah loh. Phone chung zong in cu thiam. Online le ph cu ai ralrin bia a si lai tiin ka rak ruah. Nain nihin ahcun cucu a si ti lo tiin ka ruah cang. A cungah ka thinlungput le ka duhdawtnak hi ai fiang ngai ko cang tiah ka ruah. Cu ka thinlung le ka duhdawtnak cu a co hlan duh lo a si ko rua.

Nizan kha Cuaite caah laksawng ka phurhmi kai ken loh. Ka phurhmi cu ka pek hrimhrim awk a si ti cu ka fiang. Doral lian hmanh hei hrang sehlaw ka chimmi ka bia ka tlinh hlan cu ka kianh hlei hnga maw. Cuaite caah ka laksawng pe dingin kai thawh. Van chiat ka ti hnga maw van that ka ti deuh hnga? Cuaite a rak um lo caah a nu sin ah ka laksawng ka chiah.

Cuaite nih ka duhdawtnak hi a theih lo cu a si hrim lo ti cu ka fiang. Nain cucu a ruang ka hngal loh. Hngalh zong ka duh pek loh. Cuaite nih a ka duh lo hi zeiruang hmanh va si ko seh. Dawtnak ruangah Cuaite, ai thimmi zei lam hmanh va si ai kun a ca ah lawmhnak a si paoh ahcun cucu ka lawmhpi. Caan khat lio ah mirhnak le ruahchannak a ka phurhtu Cuaite sin in a hong luangmi ka biazai hna, ka zaihla hna le ka mitthli hna hi a zalam tluannak ah cang hram hna sehlaw cucu kai lawmhnak a si hnga i nun man nei ah kai ruat hnga. Kan iton caan tawnte kha zungzal philh khawh lomi ni le caan hna ah an cang lan rua lai kei caah.

+++