BILLY GRAHAM (1918- Nihin Tiang)

 “Pathian nih kut pahnih a kan pek. Pakhat cu hmuhnak caah le adang pakhat cu peknak caah a si”

Protestant (Roman Catholic in ai tthenmi) Khrihfabu cu British ram le America ram ah kum zabu 19 chung ahhin an karh ngaingai. Hi lio caan ah Charles Darwin le John Stuart Mill nih Khrhifa chung ah zumhnak he pehtlai in lunghrinnak an chuahter. Liberal zumhnak (Baibal a zum taktak lomi tiah ka ti ko lai) le cawnpiaknak cu kum zabu 20 tiang ai pehzul. Baibal thiamsang Karl Barth le Emil Burnner cu Khrihfabu kha Baibal ah a kirpitu hna tiah ruahmi an si nain Khrihfa dang pawl nih an i tlaihmi zumhnak tak a dihlak in an zum ve lo. Hi lio caan ah cawnpiaknak hmaan lo a karh i ‘Pathian a thi’ timi zumhnak hmaan lo tiang a chuak. Cu caah Evangelical Khrihfa pawl nih heh! tiah zumhnak hmaan lo pawl an doh hna. 1928 kum ah Khrihfa pawl zumhnak hmaan lo dohnak caah ti’n Inter Varsity Fellowship of Evangelical Union tiang rak dirh a si. Cu lawng siloin cawnpiaknak hman lo doh dingah buu dangdang zong rak dirh cio an si hna.

America ram in evangelical Khrihfa chungin Billy Graham cu hruaitu lakah zohchun awktlak a sinak cu el awk a ttha lo. D.L. Moody hnu ah Billy Graham cu Khrihfa hruaitu lakah minthang bik a si lai tiah cohlan lawng siloin vawleicung ram hna nih an upat taktak mi hruaitu zong a si. Baibal ca a zumhnak in mi a thongthong in Khrih sinah a hruai hna i midang pawl a hmanmi hmun, Khrihfa zumhnak le cawnpiaknak ah a hruai hna. Billy Graham cu Charlotte, Chak Carolina pawng ah a ummi lo (Farm) ah a ummi chungkhar in a tthanglian mi a si. A tuah tawnmi cu caw zohkhenh, an ek hlonh le cawrawl pawl hlonh le thianhhlimh rian hna kha a si.

A nu le pa cu Scottish Presbyterian bu upa hmasa an si. Billy Graham nih kum 16 a si ah Mordecai Fowler Ham timi, samrang pa Crusade tuahnak in hrintthannak a hmuh. Biatak tein Baibal relnak in caan tlawmpal a hman hnu ah Tampa ah a ummi Florida Baibal Institute ah Bill Graham cu a kal i cuka ah cun a voikhatnak bik lamcung ah thawngtthachimnak a ngei. Kum 21 a si ah Baptist rianttuantu pakhat sinak caah ordain an pek. Cu hnu ah Wheaton College, Chicago ah cawnnak a ngei i 1943 kum ah minung chuahkehnak kong cawnnak (Anthropology) in a kai i a awng. Hi kum ah China ram missionary rianttuantu hna an fanu Ruth Bell he an i tthi-um. Ruth cu Billy nakin college a rak kai hmasa mi a si.

Chicago ah a ummi Baptist Khrihfabu fami pakhat ah kum hnih chung pastor rian a ttuan. Hi lio ah thawngtthachimtu mualngei tiah midang nih an ti. Cu hnu ah Northern Baptist Seminary ah Professor a simi Pastor Torrye Johson nih Zarhpi ni zanlei radio program rianttuan dingah a sawm. Johnson nih Youth for Christ timi a dirh i hi rian ah Billy Graham cu caantling evangelist rianttuantu ah a hman. America ramchung khuatlawnnak a ngeih hnu ah Billy nih England ram le Europe ram hna 1946 kum ah a tlawn hna. Hi lio ah midang nih sawm duh tthannak thinlung ngei kho tiangin midang thinlung ah an rianttuannak a cam. 1946-47 kum chung ah Billy le Cliff Barrows nih British ramchung khua 21 an tlawn hna i pumhnak voi 360 an ngei kho.

America an kir hnu ah evangelist tiin buu bantuk an dirh. Billy nih Cliff Borrows le Grady Wilson a sawm hna pin ah hlasak thiam Bev Shea zong an sawm chih i khuapi a simi hmun hna ah camping tuahnak an ngei. Mah hi an rianttuannak cu an tlamtling lo nain tonnak an ngei tthan i zei ruangah dah kan sunghnak hi a si tiah hlathlainak an tuah. Billy rianttuannak biatak tein a van i hrimtthannak cu 1947 kum ah Los Angele innfate pumhnak an ngeihnak in a si. Billy nih thlarau tihal rawlttam mi hna caah tiin thinlung dihlak le roling ngai in thawngttha bia a chimh hna. Hi caan hmannak cu zarhthum ca lawng ti a si nain mizapi nih caansau deuh ngeih an duh caah zarh riat tiang a si. Radio rianttuantu Stuart Hamblen le Jimvaus nih hrintthannak an ngeihnak thawngin Billy cu media lei in cikkhatte ah minthannak a hmuh colh.

Peng dangdang in sawmnak a tam caah Billy nih evangelist rianttuannak thar le tlamtling tein cawlcangnak ngeih dingah timhtuahnak a ngei. 1950 kum ah Billy Graham Evangelistic Association timi a dirh i zungpi cu Minneaplis ah a chiah. Rianttuannak kong ah tlamtling tein tawlrelnak a ngeih hnu ah khuapi chungah Khrihfa bu ai-awhtu hna nih tthate in sawmnak um lo ahcun crusade ngeih lo dingah biachahnak a tuah.

Hi lio caan ah Billy rianttuannak a tthanchonak ah biapi ngaingai a simi crusade voihnih tuah a si. 1952 kum, Washington crusade tuahnak ah ramkhel lei rianttuantu upa pawl hmailei ah president a si dingmi hna Richard Nixon le Lyndon Johnson nih hrintthannak an hmuh. Billy nih hruaitu Khrihfa simi hna a conglomh hna i President Eisenhower le Kennedy cu America rammi hna Pathian sin an kir tthan  khawh nakhnga an ti khawh chungin i zuam dingah thazaang pek in a forhfial hna. Billy cu evangelist cawlcanghnak lei ah hmaifongtu a si bantukin media lei zong in thawngttha karhnak a tthanchoter. Radio caan hmannak (Hour of Decision) a dirh, nifatin news paper (My Answer) timi a chuah, cauk a ttialmi ah zuartam bik a simi (Peace with God) le film muicawl in Mr. Texas le Oiltown ti’n USA ramchung ah evangelist rianttuannak a ngei chih fawn.

1954 kum ah Evangelical Alliance timi sawmnak in thlathum chung London ah a ummi Harringay arena hmun ah crusade ngei dingah a kal. Hi lio ah England ram Khrihfa mi hna nih America rammi sinah lunghrinnak an ngeihmi nih bawmhnak peknak lei le carialnak (Press) lei ah dawnkhantu a rak si. Caanrau lote ah dawnhkhanhnak thil hna cu an tlam a tling tthan.

British crusade tuahnak cu London (Wembley) le Cambridge Sianghleiruun ah 1955 kum Scotland a tlawnnak in tam deuh in ngeih an si hna. London khua ah Queen a nu le Princess Margaret a ton hna i Windsor Castle ah sawmnak in Queen sinah thawngtthabia chimnak a ngei. Cu hnu ah crusade tuahmi pawl ai pehtlai duahmah hna. Manchester 1961 kum ah, Earls Court London 1966 kum ah, Sheffield 1973 kum ah, 1984 kum England mission an ngeih lio ah hmun panga ah crusade tuahnak an ngei. Hi pinah England Khrihfabu le hruaitu hna sawmnak in crusade tuahnak England ram ah a ngei rih. England ram lawng siloin ramthumnak ram hna le Africa ram tiangin crusade tuahnak a karh. 1991 kum ah Glasgow le Aberdeen khua Scotland ah a mission tuahnak bantuk cu ngeih tthan a si.

1959 kum thokin Billy nih khualtlawnnak kau deuh in a ngei. Australia le New Zealand 1959 kum ah, Africa 1960 kum ah, Japan le India 1966 kum ah, Singapore 1968 kum ah, Brazil 1974 kum ah le Far East 1975 kum ah ti’n an si hna. Avoi khatnak bik communist ram tlawnnak a ngeihmi cu Yugoslavia ram a si i 1966 kum ah a tlawng. Cu hnu ah Hungary 1977 kum ah, Poland 1978 kum ah, cu ka hmun hna ah Roman Catholic cathedral ah thawngttha chim an sawm. Nichuah Germany le Czechoslovakia ram hna cu 1982 kum ah a tlawn hna. 1982 kum ah inter-faith conference nih an ceihmi Nuclear hrawhralnak kong ah ai tel vemi cu palhnak fak ngai a si i midang nih an ceihphai ngaingai mi a si fawn.

Evangelist rianttuannak he pehtlai in World conference tuah dingmi Billy nih a hrihhawh i Berlin ah 1966 kum ah an ngei kho. Cu conference ngeihnak thawngin Lausanne coference 1974 ah an ngei tthan. A theipar a chuakmi cu vawleicung Khrihfa hruaitu hna nih hmunkhat te ah evangelist rianttuannak le social rianttuannak he pehtlai in ceihhmainak an ngei kho. Cu pinah 1983 Amsterdam Conference tonnak an ngei tthan.

Billy nih palhnak a tuah sual caan ah ngaihthiam hal in ka palh tiah a ti tawn. Ramkhel lei riantuan dingah mi tampi nih voi tampi Billy cu an sawm nain a el hna i kawhnak a hmuhmi le a zumhnak ah fekte in a dir i midang caah zumhnak lei in thazaang petu le midang nun cawmtu taktak a si. 1959 kum ah Billy nih ca a ttialmi cu Crusade kan tuahnak a theipar hi khuapi minung nun thlennak men siloin pumpak an nunnak zungzal ca in thlen a si, Khrihfabu tampi sersiam an si i rianttuantu tampi nih vision thar an hmuh tiah a ti.

Note: Vawleicung Miroling Cauk (By; Mang Hlei Cung) chungta lakchinmi a si.