MOTHER TERESA (1910-1997 A.D)

“Nizan cu a dih cang. Thaizing le a ra rih lo. Kan ngeihmi cu tuchunte a si caah tuah ding tuah zok hna usih”

Mother Teresa cu August 27, 1910 kum ah a chuak. A nu le pa cu Albania rammi, Skopje, Yugoslavia ah a ummi an si. Unau pathum chuak nu pahnih le pa pakhat an si. Chungkhar nuam ngaimi zong an si. Acozah sianginn ah a kai tawn i cuka ah cun tlangbawi pawl nih hngakchia pawl Pathian auh ningin an zulh khawh nakhnga hngakchia pawl an bawmh tawn hna. Kum 12 a si ah mi sifak caah auhnak hi a voikhatnak a rak hmuh cang. Sianginn a kai liote in zaangfahnak ngeimi buu timi ah member chungtel a rak si cang. Mah hi lio caan ah Yugoslavia ram in Jesuits rianttuantu hna nih Calcutta Archdiocese ah rianttuan ding an cohlan.

 A hmasabik buu cu 30 December 1925 ah Calcutta an rak phan. A dang buu cu Kurseong ah an kalter hna. Hi mi hna nih Bengal Mission Field rian an ttuannak he pehtlai in lungtho ngaimi ca an kuat tawn hna. Mah hi cakuat pawl cu zaangfahnak ngeimi buu a dirmi Mother Teresa member a sinak ah rel lengmang a si. Cu tikah minote a simi Theresa zong Bengal Mission rianttuan dingah ai pumpe ve. Teresa nih Ireland ram ah a ummi Khrihfa Lorito phungki nu a simi hna he pehtlaihnak a tuah hna.

A ruang cu hi Khrihfa phungki nu pawl cu Calcutta Archdiocese ah rian a ttuan cangmi an si. Mother Teresa nih kum 12 a si liote in miharsa mi sinah rianttuan dingah a nunnak pumpeknak a rak tuah cang. Kum 12 a si lioin India ram Calcutta ah missionary rianttuanmi kong hi a rak theih i, cu ticun pumpeknak a rak ngeihnak cu a si. Calcutta ah mission rianttuanmi Khrihfa phungkinu pawl Lorito tiah auhmi hna sinah 1929 kum ah Teresa nih pehtlaihnak a ngei i India ram ah a rak ra. Kum 18 a si ah Khrihfa phungki nu si ding le a chungkhar chuahtak dingah biachahnak a tuah.

Teresa nih Lorito ah 1931 kum in avoi khatnak chiatserh in biakamnak a tuah. Cun a hmanungbik chiatserh biakamnak cu 1937 kum ah a tuah nolh. Khrihfa phungki nu a si hnu ah cawnpiaknak leiah rian a ttuan. Amah cu Bengali sianginn department pakhat ah haotu a si. 1929-48 tiang Calcutta ah a ummi St. Mary’s High School ah Geography subject a chim. St. Anne sianginn zongah haotu rian a ttuan.

 

Teresa nih a nunnak ah avoi hnihnak bantuk in kawh/auhnak a hmuh nolhmi a um. Cucu 1946 kum ah Daryceling ah dinhnak caah khualtlawnnak a ngeih lio tlanglawng ai citmi cung ah auhnak a theihmi a um. Thildang vialte kaltak in Jesuh zulh i sifak lakah sifakbik hna sinah rianttuan kha a si. Theresa nih auhnak thar a hmuhmi hi ai fian tuk caah Calcutta Archbishop theihpinak le nawl peknak in Rome ah cakuat a ttial. Ai tinhmi thil atak in tlamtlin nakding caah cansaupi lak a hau. Pope Pius - XII sinah ca a kuatmi lehnak 12 April ah a don i biakamnak 1948 ah a tuah ve. Cu hnu ah India ram Patna ah sii lei a cawng. A ruang cu sifak pawl sii lei in bawmhnak pek khawh ding kha a duhmi a si. Teresa nih biaknak lei i aa pemi nu hmun khat i a ummi bu (Convent) a chuahtak hnu ah sari rang, a kil ah vandum zawng, liang ah vailamtah a ummi (Sari cu India nu pawl thilpuan hrukaihmi a si) ai hruk. Patna in Calcutta ah a rak kir nolh i sister mi tlawmte he sifak pawl sinah tthutdir hram a thawk. 21 December 1948 kum ah umnak ngei lomi hna caah a pakhatnak sianginn on dingin nawl a lak. An thawkka ah hngakchia minung 5 lawng an si. Sihmanhsehlaw nikhat hnu nikhat in minung an karh chin lengmang. Teresa nih avoi khatnak ah alphabets a chimh hna.

Cun ngandamnak lei zong a cawnpiak chih hna. Nu hna nih Teresa rianttuannak ah an von i tel tluahmah hna i a rianttuannak cu a tthangcak ngaingai. Sister tampi nih Teresa sinah an rak i tel i sifak lakah sifakmi sinah rian an ttuan hna. Sii lei doctor le Nurse pawl zong nih bawmh dingah an rak chuahhnawh len ve hna. 1952 kum ah Teresa nih a thi liomi hna caah Inn a dirh. Mah hi inn cu lamcung ah zohkhenhtu ngei lomi hna an nunnak a liam cuahmah mi umnak caah a si.

Hi lamcung ummi hna cu zu nih an taksa zetceo hna an ei cang hna. Cu minung pawl cu Teresa le a hawile nih heh! tiah an char hna i an zohkhenh an thlawpbul hna. Hi inn cu Calcutta lawng siloin Dranch le New Delhi khua ah pakhat veve 1959 kum ah an dirh nolh. Hi mizaw pawl zohkhenhnak pinah Teresa nih nu le pa nih an hlonhmi hngakchia pawl a char tthan hna i a zohkhenh hoi rih hna. Hi hngakchia pawl cu lamcung, siizung le thonginn in an char hna. 1957 kum ah thinghmui hma zawtnak in a zawmi minung 5 zohkhenhnak hram a thawk tthan rih.

Hi Thinghmui in mizaw pawl cu an chungkhar nih an inn in an chuahmi hna le an tthawlmi hna an si. Hi mizaw chungin mifim, mirum, mi liannga tampi an um ko nain an damlonak ruangah chungkhar nih an hlonhmi hna an si. Teresa nih Shantinagar timi hmunpi center a dirh tthan i mizaw pawl nih damnak an hmuh hnu ah zungthiamnak an cawnpiak hna i cu nih cun inn an lawi tikah an caah santlai tthahnem an si lai tiah ruahchanhnak he a dirhmi a si. Teresa rianttuanak cu Calcutta lawng si loin khua dangdang tiangin a karh vima.

Cu lawng hlah ramdang tiang Ceylon, Tanzania, Venezuela le Rome tiang in a hungcho cang. 1963 kum ah Archbishop nawlpenak in Brother-Mission Charity a dirh tthan. Mah hi buu nih pa pawl sinah thawngttha bia chim an i zuam. 26 March, 1969 kum ah Teresa hawile nih Teresa telin Missionaries of Charity an dirh tthan. Teresa rianttuannak cu hiti hin ai peh tluahmah. Teresa nih phaisa kongah Pathian sinah zumhnak a ngei peng. A rianttuannak caah bawmtu hna sinah lawmhnak bia cakuat in le pumpak in a chim peng.

Teresa nun cu duh a nung tukmi a si. Thilpuan ah a sawsawh te Sari a rangmi, a kil ah vandum zawng a simi te ai hruk peng. Thilpuan tampi a ngei bal loh. Sui, ngun le rothil zei hmanh a ngei lo. Sifakmi hna sinah Jesuh nun a langhtertu a si.

Teresa Nih Laksawng A Hmuhmi Hna; · September 1962 kum ah India President nih Padamshree Laksawng a pek. Cun Philippines President nih Magsaysay Laksawng a pek. · 6 January 1971 kum ah Pope Paul VI nih Pope John XXIII daihnak laksawng a hmuh. · 26 August 1971 kum ah USA in “The Good Samaritan” laksawng a hmuh. · 16 August 1971 kum ah John F. Kennedy International Laksawng a hmuh. · 28 October 1971 kum ah Washington in Doctor of Humane Degree a hmuh. · 15 November 1972 kum ah India ram laksawng sangbik Jawaharlal Nehru Laksawng a hmuh. · 19 June 1974 kum ah America ram in “Mater at Magistra” Laksawng a hmuh. · 1979 Kum ah Nobel Daihnak Laksawng a hmuh. Mother Teresa cu kum 87 a si, 5 September 1997 ah hi vawlei in a nunnak a liam. India ram nih Mother Teresa thih cu kan ram nih kan sungh taktak mi a si tiah an ti. Mahatma Gandhi thihnak bantukin India rampi nih Teresa an ngaihchiat pi.

Note: Vawleicung Miroling Cauk (By; Mang Hlei Cung) chungta lakchinmi a si.