“Ngaihchiatnak, sunghnak le fahnak lak
zongah kan rian cu amah ning a si ko; Burma hmunttha lo ah kan cin i Zion tlang
ah rawl kan ttuan”
Adoniram cu 1788 kum ah Massachussets,
United States ah Minister le sii sertu hna chungkhar in a chuakmi a si. Brown
Sianghleiruun in sianginn a dih. Fimcawnnak a ngeih lioah a hawipa a simi James
Eames nih Deism zumhnak lei in a iap ngaingai. (Deism nih cun khuaruahhar
thiltuahnak, prophet biaphuan an zum lo i Khrih cu minung a si kho lo tiah an
ti). Cu caah Judson cu Khrihfa sinak ah lungawttawmnak a ngei.
Sianginn a dih hnu ah a nu le pa nih
an chimhmi le nawlnak el in vawlei nuamhnak tuah dingah timhtuahnak a ngei i,
New York khua lei a phanh. New York khua ah a rianttuanmi ai lungsi lo caah
England ram leiah a kal tthan. Lampi a kalnak ah riahnak inn pakhat ah a riak.
Cu zaan ah zankhua dei in mizaw hrum-ai thawng a riahnak khan khatlei in a
theih peng. A thaizing ah Judson nih cu mizaw cu hodah a si tiah a va hlatkai
tikah a hawipa James Eames kha a rak si i a nunnak a dih cang. Mah hi thil
cangmi nih Judson a lauter hringhran. Cu caah Judson nih a lungthin a thlen tthan
i inn leiah 1808 kum ah a kir tthan. Judson, apa nih ruahnak a pek bantukin
Judson nih a pa Seminary tuahmi ah biatak hmuh dingah biakhiahnak a tuah. Thla
tlawmpal hnu ah Judson nih Pathian sinah pumpeknak a ngei taktak ve.
Mah hi College a ummi sianghleikai
pawl cu hmunkhatte ah thlacamttinak an ngei tawn. Cu an thlacamnak in an
thinlung ah a chuakmi cu ramdang ah missionary rianttuannak thawk hi a si. Cu
tikah American Board of Commission for Foreign Missions buu dirh a si i; cu hnu
ah Judson cu India ram ah Missionary a voikhatnak bik thlahmi a si. India ram
kal ai thawh hlan ah Ann Hasseltine (Nancy) he an i tthi-um. Nancy zong nih
thawngttha thei rih lomi sinah kal i rianttuan hi a duh ngai ve. An i tthit-umh
ni 13 hnu, 1812 February thla ah India ram kal an i thawh i, Calcutta cu June thla
canceo ah an phan kho. An khualtlawnnak tilawng cu honeymoon bantuk Judson le a
nupi caah cun a si. Mah hi an khualtlawn caan chung vialte ah Baibal ca tthate
in relnak le cawnnak an ngei veve. Judson nih hi khualtlawnnak caan ah Baibal a
relnak in tipil in ah pum dihlak in tipilnak ngeih ding kha ai fiang tthan.
Zeica’htiah America ram Judson a Khrihfabu
nih hngakchiat lio tipil peknak kha an pommi le an zulhmi a si. Judson nih hi
bantuk tipil innak ah zumhnak thar a ngeihmi cu annu nih a el nain caan
tlawmpal hnu ah Judson zulhmi a zulh ve tthan. India ram an phanh hnu ah William
Ward nih Judson le Nancy cu tipil a pek veve hna. Mah hi Judson tipil innak
ruangah America a Khrihfabu nih bawmhnak an pe duh hna loh. Sihmanhsehlaw
Mission Society America ram in Baptist buu pawl a simi nih Judson cu bawmhnak
an pek tthan.
Mah hi lio caan ah East India Company
nih India ram a rak phanka mi Judson te nupa cu an doh tuk hna caah Rangoon,
Kawlram (Burma) ah an kal. Mah hi lio caan ahhin Kawlram ah missionary rianttuantu
midang an rak um cang. Cu hna sinah Judson te nupa cu an um i; Judson cu nikhat
ah suimilam 12 chung Kawlholh a cawng. Nancy cu Kawl nu pawl he hawikomhnak a
ngei i Kawlholh fawite in a thiam. Judson nih hin Kawl cattial hi ai harh
ngaingai.
Kawlram cu Buddhist biaknak a biami
ram a si bantukin Judson te nupa nih harnak tampi an ton len. Buddhist biami
caah zungzal pathian timi an ngei lo. An pathian cu Buddha a si. Kawl miphun
sinah Khrih thawngttha chim hi a har ngaingai. Buddha milem khi an inn ah an
chiah i cucu an biak. Voi tampi acozah nawlgneitu nih mission rianttuantu pawl
sinah duhlonak an tuah hnawh lengmang fawn hna.
Hi an umnak hmun hi khualeng a si caah
midang Kawl miphun pawl he hawikomh caan hi an ngei kho tuk lo. Cuti a si tikah
1819 kum ah Pura kalnak lam ah Judson nih Zayat timi a tuah (Zayat cu mizei
paoh caah hmun pekmi a si i, cuka ah cun biaruahnak siseh, cun biaknak lei
cawnpiaknak zong kha ngeih khawhnak hmun a si). Judson nih Buddhist biaknak ah
an hmanmi zeimaw zat cu Khrihfa biaknak ah a rak luhpi ve. Cucu tthut bu in
Pathian thangtthatnak ngei ti bantuk khi a si. Judson nih Zayat a tuahmi
thawngin tampi a rianttuannak a bawmh i midang he pehtlaihnak an ngei kho i thawngttha
zong mi tampi sinah a phuan khawh cang. Judson nih Zayat a tuah hnu thla
tlawmpal chung ah Maung Nau hi a hmasabik Khrihfa biaknak a cohlangtu a si.
Cutite cun duhsah huamsamte in Kawlram Khrihfabu cu a karh ziahmah ve i 1820
kum ah minung 10 nih tipil an in.
Judson te nupa cu khua caan linh tuk
nakin damlo, taksa linhnak fak in an zaw. An fapa Roger zong damlonak fak tuk
nih a tlunh ve. 1820 Kum ah Nancy fak tukin a zawt caah Calcutta ah a rak i
thlawp. Cu hnu ah United State ah thlawp dingah a kal tthan. Mah hi lio caan ah
Judson nih Biakam Thar cauk Kawl holh in a lehmi a lim. Rangoon khua in Ava ah
Judson cu ai tthial. Ava ah sii lei missionary rianttuanmi Jonathan Price timi
pa nih Judson cu a rianttuannak bawmh dingin a sawm. Zeica’htiah Judson cu Kawl
holh a thiam caah holhlet dingah a bawmh.
Nancy cu United States ram in Ava ah a
rak kir tthan i anpa mission rianttuan a rak bawmh tthan. Asinain caansau an
umtti manh lo. A ruang cu Kawl miphun le England miphun kar ah ral a tho i
ramdang mi paopaoh cu England mingiatu an si tiah sual an phawt hna. Cu tikah
Jonathan le Judson cu an tlaih hna i; an pahnih in misual pawl chiahnak thonginn,
hmunthurnak ah an thlak hna. Mah hi hmun thonginn cu a muih in a mui. An ke an
hren hna. Zan ah an chukbiling in an tlai hna i an lu le an liang nih a
thaizing ah cun tuang a phanh. Cu ruangah an takpum dihlak a hit dih cikcek.
Nichiar in thongtla thah an si fawn. Hi dirhmun ah Judson nih ka nunnak hi a
him lai tiah a ruat kho hrimhrim ti lo. Nifatinte thinphan thlalaunak in an
khat i, luatnak hmuh dingah ruahchannak a um hrim lo.
Luatnak hmuh ding cu chim lo zeitik ah
dah thah hi hawidang thongtla mi bantuk in kan si ve te lai ti ruah ah celh awk
a ttha lo. Judson nupi Nancy nih nichiar in thonginn nawlngeitu a rak ton hna i
a pasal hi England mi a si lo, America rammi a si tiah a rak chim lengmang. A
caan ah thong nawlngeitu sinah an pa luatnak a hmuh nakhnga zik a nawh tawn
hna. Hi lio caan ah fa a pahnihnak a pawi liopi a si.
1825 May ah British ralkap pawl Ava
khua an rak phan. British ralkap pawl ttih ah thongtla pawl chaklei thonginn ah
an tthial hna. Thongtla pawl cu keden an ngei lo. Ramtang ah cu ti cun an kalpi
hna. Judson cu a ke in thi an chuak dih. Cu tikah kar khatte van hlan zong hi
Judson nih a celh hrim lo. Tiva pakhat cungah hlei an donhmi an zawh lioah
Judson nih hi bantuk dirhmun in harsatnak tonnak cun hlei cung in zuan i mahte
in nunnak i lak dingah khua a ruat. Sihmanhsehlaw mah lio caan ah Judson nih a
van ruah tthan rihmi cu hi nakin harsatnak tuar deuh mi Jesuh nun kha a van theihhngalh
tthan caah mahte nunnak i laknak tukforhnak kha a tei khawh tthan.
.jpg)
Judson cu kumkhat le a cheu thong a
tlak hnu 1925 kum ah Kawlram le England ram daihnak caah ceihhmainak an ngei i
cu tikah holhlettu ah Judson cu an duh caah luatnak an pek. Holhlet dingah
khualtlawnnak a ngeih lioah a nupi Nancy nih damlonak in a nunnak a liamtak.
Caanrau lote ah a fanu Maria zong damlonak in a nunnak a liam ve tthan. Hi thil
thihnak fak nih Judson ngaihchiatnak in a khahter i missionary rian a ttuanmi
zong a lung ah a um ti lo. Lunglen lungkuai celh lo ah midang he hlat in a um.
Baibal ca a lehmi zong can zeimaw zat chung cu peh zulphah kho ti loin a um. Zumtu
dang thlacampiaknak, thapeknak le Pathian bia in thazaang laknak thawngin
Judson ngaihchiat lungrawhnak an van zor ziahmah tthan. Cu hnu lawngin cun
Judson nih Baibal lehnak in caan tampi a pek tthan. 1840 kum, a nupi Nancy
thihnak in kum 40 a luan hnu ah Judson nih Baibal dihlak Kawl holh in a leh
dih.
1834 kum ah nuhmei a simi kum 30 Sarah
cu Judson nih a tthit. Judson cu kum 46 a si cang. Kum 10 an i tthitnak a si ah
fa 8 an ngei. 1845 kum ah Sarah nih a fa hnubik a ngeihnak ah thlawpbulnak
ngeih dingah United States an kal pah ah Sarah nunnak a liam. Cu caah 1846 kum
ah Judson nih England ram ah cattial thiam mi Emily Chubbock a ton i a pahrang
Pathian rian ah hmang dingin a sawm hnu ah cu kum ah cun an i tthi-um i, 1846
November thla ah India ram ah an pahnih in an kal. Kum 3 Pathian rian an ttuan
hnu ah fanu te an ngei.
Adoniram Judson cu zawtnak fak tuk nih
a tlak caah, i thlawpbul ding a kal pah rili cungah a nunnak a liam. Cu hnu ah
a nupi Emily le a fanu te cu United States ah an kir tthan. Adoniram Judson
hmaban, Kawlram Missionary rianttuannak cu midang missionary rianttuantu pawl
nih an peh zulh.
Note: Vawleicung Miroling Cauk ( By; Mang Hlei Cung) chungta lakchinmi a si.
-----------------
No comments:
Post a Comment